С. Жақыпова БҰҰ Бас хатшысының орынбасары Х.Шумен кездесті

ҚР Еңбек және халықты әлеуметтік қорғау министрі Светлана Жақыпова мен БҰҰ Бас хатшысының орынбасары, БҰҰ Даму бағдарламасы әкімшісінің орынбасары Хаолян Шу Еңбек және халықты әлеуметтік қорғау министрлігі (бұдан әрі – ЕХӘҚМ) мен БҰҰДБ арасындағы стратегиялық әріптестіктің нәтижелері мен перспективаларын талқылады.

ЕХӘҚМ басшысы БҰҰДБ-ның Қазақстандағы ұзақ мерзімді ынтымақтастығы мен қызметі кедейшілікті төмендетуге, мүгедектер мен халықтың басқа да әлеуметтік осал топтарының құқықтарын қамтамасыз етуге, арнаулы әлеуметтік қызмет көрсету жүйесін дамытуға бағытталған ірі бірлескен жобаларды жүзеге асыруда әсерлі нәтижелерге қол жеткізуге ықпал еткенін атап өтті.

Жақыпова БҰҰДБ-мен тығыз ынтымақтастықты одан әрі жалғастыру республикадағы әлеуметтік-еңбек саласының тиімді дамуына жол ашатынын жеткізді.

Сондай-ақ Еңбек министрлігінің басшысы ведомствоның цифрлық шешімдерін, атап айтқанда, азаматтардың мемлекеттік қолдау шараларына деген қажеттіліктерін белсенді түрде анықтауға және оны жедел көрсетуге мүмкіндік беретін Цифрлық отбасы картасы, сондай-ақ мүгедектерді техникалық құралдармен және оңалту қызметтерімен ыңғайлы және қолжетімді форматта қамтамасыз ету платформасы – Әлеуметтік қызметтер порталын көрсетті.

Өз кезегінде Хаолян Шу да БҰҰДБ мен ЕХӘҚМ бірлескен жұмысын жоғары бағалап, ынтымақтастықтың перспективалық бағыттарын дамытуға қызығушылық танытты, сондай-ақ министрліктің озық цифрлық шешімдерін оң бағалап, олардың әлеуметтік қолдаудың заманауи және инклюзивті жүйесін қалыптастырудағы маңыздылығын атап өтті.

Кездесу соңында БҰҰ-ның Тұрақты даму мақсаттарына сәйкес Қазақстанда адам құқықтарына негізделген әлеуметтік қорғау жүйесін дамыту бойынша ынтымақтастықты тереңдету мүмкіндіктері талқыланды.

• 04.06.2025
• 39