Қаржылық мониторинг агенттігі «Қылмыстық жолмен алынған кірістерді жылыстатуға және терроризмді қаржыландыруға қарсы іс-қимыл туралы» заң жобасы талқылауы аясында Мәжіліс депутаттарының, Ұлттық банк, «Атамекен» ҰКП және ұялы байланыс операторларының қатысуымен кеңес өткізді

Кездесу барысында ұялы байланыс операторларының кірістерді жылыстатуға және терроризмді қаржыландыруға қарсы іс-қимыл (ҚЖ/ТҚҚ) жүйесіндегі рөліне қатысты негізгі мәселелер қаралды.

Агенттік бірқатар жүйелі проблемаларды атап өтті. Атап айтқанда, мобильді баланстарды дропперлер мен есірткі сатушылар, сондай-ақ заңсыз онлайн-казино мен букмекерлік кеңселердің операторлары пайдалану кезінде тиісті сәйкестендірудің болмауы айтылды.

Жаңа заңға сәйкес, ұялы байланыс операторлары қаржылық мониторинг субъектілері қатарына енеді және ҚЖ/ТҚҚ саласындағы заңнама талаптарын — соның ішінде клиенттерді сәйкестендіру және күмәнді операциялар туралы ақпарат ұсыну міндеттерін орындауға тиіс.

Агенттік ұсынған шаралардың бірі — транзакциялардың ашықтығын арттыру және тәуекелдерге жедел әрекет ету мақсатында ұялы байланыс операторларының ақпараттық жүйелерімен интеграцияны енгізу. Кездесу қорытындысы бойынша қатысушылар ҚЖ/ТҚҚ саласындағы заңнама талаптарын сақтау мақсатында әріптестікті дамытуға мүдделі екендіктерін растады.

• 30.06.2025
• 14