Банктер клиенттердің – жеке тұлғалардың құқықтарын қорғау жөніндегі бөлімшелер құрады

Қаржы нарығын реттеу және дамыту агенттігі екінші деңгейдегі банктерде тәуекелдерді басқару және ішкі бақылау жүйесін жетілдіру мақсатында банктерде қаржылық көрсетілетін қызметтерді  тұтынушылардың құқықтарын қорғау жөніндегі арнайы бөлімшелер құруға бастамашылық жасады. Бұл жаңалық озық халықаралық тәжірибеге сәйкес келеді.

Тиісті өзгерістер Агенттік Басқармасының 2025 жылғы 25 шілдедегі №29 қаулысымен «Екінші деңгейдегі банктерге, Қазақстан Республикасының бейрезидент-банктерінің филиалдарына арналған тәуекелдерді басқару және ішкі бақылау жүйесін қалыптастыру қағидаларын бекіту туралы» Қазақстан Республикасы Ұлттық Банкі Басқармасының 2019 жылғы 12 қарашадағы № 188 қаулысына енгізілді.

Банктердің жаңа бөлімшелері клиенттердің құқықтарын қорғаудың екінші желісінің функцияларын орындайды және банктің басқа құрылымдарынан тәуелсіз жұмыс істейтін болады. Оның міндеттеріне мыналар кіреді: алдын ала сатып алулар арқылы клиенттердің құқықтарының сақталуын бақылау, жеке тұлғалардың қарыздарын өтеу тәртібін үйлестіру, шарттарды келісу және қаржылық өнімді ілгерілету кезінде тұтынушылар үшін тәуекелдерді талдау, шағымдарды қарау процестерінің тиімділігін және қызмет көрсету сапасын бағалау, сондай-ақ банктің қаржылық өнімдерін ілгерілету және жарнамалау тәжірибесін талдау.

Қаулы сондай-ақ белгілі бір факторлар орын алған кезде жеке тұлғаларды тәуекел деңгейі жоғары қарыз алушылар ретінде жіктеу өлшемшарттарын белгілеу бөлігінде жеке тұлғалардың кредит қабілеттілігін бағалауға қойылатын талаптарды күшейтуді көздейді.

Агенттік сондай-ақ жеке тұлғалардың өмірлік жағдайларын бағалауға байланысты олардың берешегін реттеу жөнінде кредиттік шешімдер қабылдаудың ішкі тәртібінің болуына қойылатын талаптарды күшейтуде.

Басқарма қаулысының толық мәтінімен Агенттіктің интернет-ресурсында танысуға болады.

• 08.08.2025
• 29