Агенттік «KMF Банк» АҚ-қа банктік лицензия берді

Қазақстан Республикасының Қаржы нарығын реттеу және дамыту агенттігі «KMF Банк» АҚ-қа банк операцияларын жүргізуге лицензия берді. Банк Мемлекет басшысы Қ.Қ. Тоқаевтың 2023 жылғы қыркүйектегі жыл сайынғы Қазақстан халқына Жолдауында айтылған банк секторында бәсекелестікті арттыру жөніндегі тапсырмасын жүзеге асыру аясында ашылуда.

Салтанатты тапсыру рәсімінде Агенттік Төрағасы Мәдина Әбілқасымова лицензияны «KMF Банк» АҚ Басқарма Төрағасы Шалқар Жүсіповке тапсырды. Жаңа банк Қазақстандағы екінші деңгейдегі 23-ші банк болды және еліміздегі ірі KMF микроқаржы ұйымын қайта құру жолымен құрылды.

KMF – 1997 жылдан бері жұмыс істеп келе жатқан қаржы секторының ең көне және ең орнықты қатысушыларының бірі.
2024 жылдың қорытындысы бойынша ұйым активтер, портфель көлемі және клиенттер саны бойынша Қазақстанның микроқаржы ұйымдары арасында бірінші орынды иеленді. Жұмыс істеген жылдары KMF ауқымды өңірлік желі құрды және өзін әлеуметтік бағыттағы және қаржылық тұрғыдан тұрақты институт ретінде көрсетті.

2025 жылғы 1 тамыздағы жағдай бойынша, KMF активтері 395 млрд теңгені құрады. Кредит портфелі 315 млрд теңгеге жетті, бұл ретте қаражаттың 90%-дан астамы аграрлық сектордағы 100 мыңнан астам қарыз алушыны қоса алғанда, шағын және орта бизнесті қаржыландыруға жұмсалды.

Кәсіпкер әйелдерге қолдау көрсету желісі бойынша жобалар экономиканың нақты секторы субъектілеріне KMF берген кредиттердің 55%-ын құрады. Клиенттерінің жалпы саны 275 мыңнан асты, олардың 70%-нан астамы өңірлерде тұрады.

90 күннен астам мерзімі өткен берешек деңгейі 6%-дан төмен деңгейде қалды, ал капитал жеткіліктілігі 22%-дан жоғары, бұл қаржылық орнықтылығының жоғары екенін білдіреді. Филиал желісінде тұтастай еліміз бойынша 17 филиал мен 123 құрылымдық бөлімше болды. Қызметкерлердің жалпы саны 2 500 адамнан асты, олардың ішінде шамамен 70%-ы өңірлік бөлімшелерде жұмыс істейді.
180 мыңнан астам адам KMF өзінің негізгі акционері болып табылатын KMF-Демеу корпоративтік қорымен бірлесіп іске асырған әлеуметтік жобалар арқылы қаржылық және бизнес-сауаттылықты оқып үйренді.

Берілген лицензия банкке заңды тұлғалардың депозиттерін қабылдауды, банктік шоттар ашуды және жүргізуді, кассалық және аударым операцияларын, кредиттер беруді және шетел валютасымен айырбастау операцияларын жүргізуді, банктік кепілдіктерді, оның ішінде банктің жаңа мобильді қосымшасында беруді қоса алғанда, банк операцияларын жүзеге асыру құқығын береді. Жеке тұлғаларға қызмет көрсету депозиттерге міндетті кепілдік беру жүйесіне қосылғаннан кейін мүмкін болады.

Банк мәртебесінде «KMF Банк» АҚ ШОБ-ты, оның ішінде шалғайдағы өңірлер мен ауылдық жерлерде ШОБ-ты қаржыландырудағы, сондай-ақ дәстүрлі банкинг пен цифрлық шешімдерді біріктіре отырып, банк қызметтерінің желісін кеңейтудегі басымдықты сақтап қалуды жоспарлап отыр.

KMF Банк 2025 жылы банктік лицензия алған екінші жаңа банк болды. Осының алдында 25 маусымда «БиЭнКей» коммерциялық банкі» АҚ-қа лицензия берілген болатын. Бүгінгі таңда елімізде 23 екінші деңгейлі банк жұмыс істейді, оның ішінде 11 шетелдік қаржы топтарының қатысуымен.

• 13.08.2025
• 13