Құрметті достар, сіздерге тамаша жаңалығым бар!

Жаңа оқу жылы қарсаңында және көрнекті ғалым, академик, Қарағанды университетінің алғашқы ректоры Евней Арыстанұлы Бөкетовтің 100 жылдығына орай Қазақстан Республикасының Президенті академик Е.А. Бөкетов атындағы Қарағанды университетіне ерекше мәртебе беру туралы Жарлыққа қол қойды.

Ұлттық жоғары оқу орны мәртебесінің берілуі – университеттің ел дамуына қосқан үлесін мойындау және Қазақстанның болашағына жасалған инвестиция. Бұл Мемлекет басшысының ғылым мен жоғары білімді дамытуға бағытталған стратегиялық бағытының маңызды нәтижесі.

Университет Қазақстан Республикасындағы үздік көп салалы оқу орындарының қатарында. ҚарУ құрылымында 20 ғылыми-зерттеу институттары, орталықтар мен зертханалар бар, олар фундаменталды және қолданбалы зерттеулер жүргізеді. Университет әлемдік және аймақтық QS рейтингтеріне, сондай-ақ ұлттық IQAA және IAAR рейтингтеріне енеді. Екі жақты білім беру, Ресей, Түркия, Қырғызстан және Өзбекстан университеттерімен қос диплом бағдарламалары жүзеге асырылады.

Қазақстандағы ұлттық университет мәртебесі – білім мен ғылым саласында жетекші екенін мойындау ғана емес, сонымен қатар жоғары сапалы білім беру, ғылыми зерттеулер жүргізу мүмкіндіктерін кеңейту және халықаралық білім беру бағдарламаларына белсенді қатысуға жол ашатын ерекше мәртебе.

Ұлттық университет мәртебесін алу – бұл университет ұжымының білім мен ғылым сапасын арттыруға бағытталған көп жылдық еңбегіне берілген лайықты баға және халықаралық деңгейдегі бәсекеге қабілеттілікті нығайтып, Қазақстанның дамуына елеулі үлес қосу үшін алдағы уақытта да табанды еңбек етуді талап ететін үлкен жауапкершілік.

Осынау сүйінші хабармен оқу орнының профессорлық-оқытушылық құрамын, қызметкерлерін және студенттерін шын жүректен құттықтаймын. Әсіресе, бірінші курс студенттеріміз үшін қуаныштымын! Сіздер ұлттық университет қатарына қосылған білім ордасында жолдарыңызды бастайсыздар, алдарыңызда білім алуға, ғылыми жаңалықтар ашуға және тұлғалық дамуға мол мүмкіндік бар.

• 14.08.2025
• 32