ҚР СИМ мемлекеттік көрсетілетін қызметтерді ұсынудың қоғамдық тәртібін көрсетті

ҚР СИМ – 2021 жылғы 5 наурыз. Бүгін, Сауда және интеграция министрлігі аппаратының басшысы Жәнібек Нөпіровтың төрағалығымен мемлекеттік қызмет көрсету тәртібін таныстыру бойынша кеңес өтті.  Ведомство мысал ретінде «Тауарлардың жекелеген түрлерінің импортына және (немесе) экспортына лицензия беру» мемлекеттік қызмет көрсету схемасын ұсынды.

Кеңеске «Адалдық алаңы» жобалық кеңсесінің өкілі Саттар Сыздықов, «Ұлттық ақпараттық технологиялар» АҚ, ҚР Мемлекеттік қызмет істері агенттігінің, ҚР Цифрлық даму, инновациялар және аэроғарыш өнеркәсібі министрлігінің өкілдері қатысты.

«Қазіргі таңда мемлекеттік көрсетілетін қызметтер өтінішті автоматты түрде қабылдайтын, көрсетілетін қызметті алушының өтініші бойынша мемлекеттік қызмет көрсету нәтижесін өңдейтін және қалыптастыратын www.elicense.kz порталы арқылы көрсетіледі. 2020 жылдың қаңтар айынан бастап мемлекеттік қызмет көрсету толықтай автоматтандырылды және 15 күннен 1 күнге дейін қысқартылды. Автоматтандырылған процесс тәулік бойы қызмет берушінің қатысуынсыз, порталда сақталған қызмет беруші басшысының ЭЦҚ мемлекеттік қызмет көрсету нәтижесіне қол қою арқылы жүзеге асырылатынын атап өткім келеді», - деді Жәнібек Нөпіров.

Жәнібек Нөпіровтың айтуынша, Қазақстанға тарифтік квоталар көлемі жыл сайын Еуразиялық экономикалық комиссия алқасының шешімімен бекітіледі.

Естеріңізге сала кетейік, Қазақстан Республикасының 2014 жылғы 14 қазандағы Заңымен ратификацияланған Еуразиялық экономикалық одақ туралы шартқа сәйкес үшінші елдермен саудада тарифтік емес реттеудің бірыңғай шаралары, оның ішінде оларды әкімшілендірудің бірыңғай тәртібі қолданылады.

ҚР ҰЭМ 2015 жылғы 20 қаңтардағы № 30 бұйрығымен бекітілген Еттің жекелеген түрлерін Қазақстан Республикасының аумағына әкелуге тарифтік квоталар көлемдерін бөлу қағидаларына сәйкес: тарихи жеткізушілер, қайта өңдеушілер және жаңа жеткізушілер үшін сиыр етін; тарихи жеткізушілер мен жаңа жеткізушілер үшін құс етін әкелуге тарифтік квоталар көлемдерін алу құқығы көзделеді.  

Ведомство өкілдері аталған қағидаларға сәйкес Тарихи жеткізушілер арасында сиыр еті мен құс етін әкелуге тарифтік квоталар көлемін бөлу ҚР ҚМ Мемлекеттік кірістер комитетінің алдыңғы 2 жылдағы деректері негізінде 2 кезеңде жүзеге асырылатынын атап өтті.

1-кезең: 31 желтоқсанға дейін 1-ші жыл мен 9 айдың деректері негізінде тарифтік квоталар көлемінің 25%-ы бөлінеді, 2-кезең: 15 сәуірге дейін өткен 2 жылдағы деректер негізінде тарифтік квоталар көлемінің 75%-ы бөлінеді.

Бұдан басқа, жаңа жеткізушілер арасында бөлу 1 наурыздан бастап кезектілік ретімен лимит біткенге дейін жүзеге асырылады, тарифтік квотаның мәлімделген көлемі бір жеткізушімен жалпы көлемнің 15%-ынан аспауы тиіс.

Өз кезегінде, «Адалдық алаңы» жобалық кеңсесінің өкілі Саттар Сыздықов   осы процестердің тәсілдері мен  мониторингіне қатысты пікірін білдірген еді. ҚР СИМ жанындағы «Адалдық алаңы» жобалық кеңсесінің мақсаты - азаматтық диалогты жолға қою, таңдамай ашық жұмыс істеу, сондай-ақ Министрлікпен өзара іс-қимылды айқындау» - деп түйіндеді сөзін С. Сыздықов.

Келіссөздер қорытындысы бойынша, жобалық кеңсе Министрлікке ҚР МКК және ҚР  ЦДАӨМ-мен бірлесіп тарихи жеткізушілер арасында квоталарды бөлу процестерін автоматтандыру мәселесін пысықтауды ұсынды.

• 15.03.2021
• 238