Айдарбек Сапаров Алматы облысындағы аграрлық сала өкілдерімен кездесті

Ауыл шаруашылығы министрі Айдарбек Сапаров жұмыс сапары аясында Алматы облысының тұрғындарымен кездесу өткізді. Жиынға шаруа қожалықтарының, қайта өңдеу кәсіпорындарының, салалық қауымдастықтар мен жергілікті атқарушы органдардың өкілдері қатысты.

Айдарбек Сапаров Мемлекет басшысы агроөнеркәсіптік кешенге ауыл шаруашылығының жалпы өнім көлемін екі есеге арттыру міндетін қойғанын айта келіп, осыған байланысты аграрлық сектордың тиімділігін арттыруға, заманауи технологияларды енгізуге және экспорттық әлеуетті кеңейтуге ерекше назар аударылып отырғанын атап өтті.

«Біздің басты мақсатымыз – Президент жүктеген міндеттерді өуақытында сапалы жүзеге асырып, елдің азық-түлік қауіпсіздігін қамтамасыз ету және аграрлық сала үшін қолайлы жағдай жасау. Осы бағытта жеңілдетілген несиелеуді дамытып, қосылған құны жоғары өнімдерді өңдеуді ынталандырып жатырмыз. Алматы облысы – елдің жетекші аграрлық өңірлерінің бірі, дегенмен оның әлеуеті толық жүзеге асырылып отырған жоқ, бірақ барлық мүмкіндік бар», – деп атап өтті министр.Сонымен қатар, соңғы 10 жылда көктемгі егіс және күзгі жиын-терін жұмыстарына бөлінетін қаржы көлемі 70 млрдтан 700 млрд теңгеге дейін артқанына назар аударды.
Биылғы жылы 8 мың ауыл шаруашылығын өндірушілерге жалпы сомасы 502 млрд теңге көлемінде қолдау көрсетілді. Оның ішінде Алматы облысының 320 шаруашылығы 14,4 млрд теңгеге қол жеткізді.

Әсіресе, ауыл шаруашылығы техникасын жаңартуға, қайта өңдеуді дамытуға және мал шаруашылығын қолдаудың жаңа тетіктерін ернізуге айрықша көңіл бөлініп отыр. Мемлекет басшысының тапсырмасы бойынша Ауылшаруашылығы министрлігі саланы дамытудың кешенді жоспарын әзірлеуде. Ол жеңілдетілген несиелеуді арттыруды және ауыл еңбеккерлеріне әлеуметтік шараларды қамтиды.

Кездесу барысында сала өкілдері субсидиялау, жеңілдетілген дизель отынын бөлу, мемлекеттік қолдауды жетілдіру жөнінде бірқатар мәселелерді ортаға салды. Министр барлық ұсыныстар назарға алынып, жұмыс барысында ескерілетінін баса айтты.

Айдарбек Сапаровтың айтуынша, осындай сындарлы әрі мазмұнды кездесулер фермерлердің сұраныстарына жедел әрекет етуге жол ашып қана қоймай, ел экономикасының негізі саналатын ауыл шаруашылығын серпінді дамытуға ықпал етеді.

Осы күні министр азаматтарды жеке қабылдау өткізді.

• 07.10.2025
• 4