МОНОПОЛИЯҒА ҚАРСЫ ОРГАН ЕУРАЗИЯЛЫҚ ФАРМАЦЕВТИКАЛЫҚ САММИТТЕ БАСТАМАЛАРЫН ҰСЫНДЫ

2025 жылғы 7–9 қазан аралығында Агенттіктің төраға орынбасары Е.И. Әлжан Өзбекстан Республикасының астанасы Ташкент қаласында өткен Еуразиялық фармацевтикалық саммитке қатысты.

Саммит барысында төраға орынбасары монополияға қарсы органның бастамалары мен ұсыныстарын таныстырды. Аталған бастамалар Қазақстан Республикасының Денсаулық сақтау министрлігі тарапынан қолдау тауып, іске асырылып келеді. Бастамалар дәрілік заттардың айналымы саласындағы негізгі бизнес-процестерді оңтайландыруға – препараттарды тіркеу мен оларды сатып алу тізіміне енгізу рәсімдерін цифрлық шешімдер арқылы жетілдіруге және дәрі-дәрмек бағасын мемлекеттік реттеуден кезең-кезеңімен бас тартуға бағытталған.

Сонымен қатар, баға қалыптастыру тетіктерін, Бірыңғай дистрибьютордың сатып алу қызметін жетілдіру, дәрілік заттар мен медициналық қызметтерге қосымша төлем жүйесін енгізу бойынша жоспарлар да баяндалды.

Саммит аясында инъекциялық дәрілік препараттарды ампула түрінде өндіретін «Rompharm NS» фармацевтикалық зауытына бару ұйымдастырылды. Денсаулық сақтау министрлігі мен оның ведомстволық бағынысты ұйымдары өкілдерінің қатысуымен өткен танысу барысында Өзбекстан фармацевтика саласының қазіргі өндірістік қуаты мен технологиялық даму деңгейі бағаланды.

Алынған тәжірибе отандық өндірісті дамытуға және Қазақстанның фармацевтикалық нарығындағы бәсекелестікті арттыруға бағытталған ұсыныстарды әзірлеу кезінде пайдаланылатын болады.

• 21.10.2025
• 16