Бүгін Польшадағы «Selena Group» холдингінің өкілдерімен кездесті

Бұған дейін де осы компаниямен инвестициялық жобаны іске асыру мәселелерін талқыланған болатын. Компания – құрылыс химиясын өндіретін әлемдік жетекші өндірушілердің бірі және қазақстандық нарықта тұрақты орны бар.

Кездесу барысында Шымкент қаласында құрғақ құрылыс қоспаларын шығаратын зауытқа қатысты егжей-тегжейлі мәселелер және болашақ өндірісті қажетті инфрақұрылыммен қамтамасыз ету жайы қаралды.

Жобаның жалпы құны 10 миллион АҚШ доллары. Зауыттың өндірістік қуаты жылына 150 мың тонна өнім болмақ. Нысан құрылысы кезінде 50-ге жуық жұмыс орны, ал зауыт іске қосылғаннан кейін 100-ден астам тұрақты жұмыс орны ашылады.

Өндірісті іске қосу келесі жылдың көктеміне жоспарланып отыр. Жобаны жүзеге асыру ішкі нарықтағы отандық құрылыс материалдарының үлесін арттырып, қаланың өнеркәсіптік әлеуетін дамытуға серпін береді.

«Selena Group» компаниясы Қазақстанның сегіз қаласында өкілдігі бар, ал әлем бойынша 15 өндірістік кәсіпорынды біріктіреді, соның ішінде Астанадағы зауыт та бар.

Жобаның жүзеге асуы Қазақстан мен Польша арасындағы экономикалық ынтымақтастықты нығайтып қана қоймай, Шымкенттің заманауи индустриялық базасын қалыптастырудағы тағы бір маңызды қадам болары анық.

• 29.10.2025
• 19