Қаржы секторының өкілдері ESG-қағидаттарын енгізу тәсілдерін талқылады

Қаржы нарығын реттеу және дамыту агенттігінің өкілдері ESG-күн тәртібі мен орнықты даму қағидаттарын Қазақстанның қаржы секторына ықпалдастыруға арналған алғашқы тәжірибеге бағдарланған конференцияға қатысты. Іс-шараны «Altyn Bank» АҚ (China Citic Bank Corporation Ltd ЕБ) ұйымдастырды.

Конференцияға екінші деңгейдегі банктердің басшылары мен бейінді мамандары, бизнес өкілдері, халықаралық консультанттар, ғалымдар және ESG-практиктер қатысты. Іс-шараның мақсаты диалог, тәжірибе алмасу және ESG-стандарттарын енгізудің бірлескен тәсілдерін әзірлеу үшін тұрақты кәсіби алаң құру болды.

Агенттік ESG халықаралық стандарттарына сәйкес қаржы ұйымдары үшін нұсқаулықтар мен әдіснама әзірлейді, банк секторына климаттық стресс-тестілеу жүргізеді және ESG-облигациялар мен «жасыл» кредиттер шығаруды қоса алғанда, ESG-өнімдерінің ықпалдастырылуын қолдайды.

Кредит беруді цифрлық мониторингтеу және WE Finance Code бастамасы арқылы гендерлік теңдікті дамытуға және әйел кәсіпкерлерді қолдауға ерекше назар аударылады.

Конференция Қазақстанда орнықты және жауапты қаржы ортасын қалыптастыруға ықпал ете отырып, тәжірибе алмасу, практикалық кейстерді талқылау және ESG-қағидаттарын одан әрі енгізу бойынша ұсынымдар әзірлеу үшін маңызды платформаға айналды.

• 05.12.2025
• 14