Айдарбек Сапаров Оксанa Лутпен екіжақты сауда мәселелерін талқылады

Ауыл шаруашылығы министрі Айдарбек Сапаров Ресей Федерациясының ауыл шаруашылығы министрі Оксана Лутпен кездесті.

Онда екіжақты сауда мәселелері және агроөнеркәсіптік кешенде Қазақстан–Ресей ынтымақтастығын дамыту әңгіме өзегіне айналды.

«Қазақстан мен Ресейді агроөнеркәсіп саласында көпжылдық стратегиялық серіктестік байланыстырады. Біздің елдер Еуразиядағы негізгі азық-түлік өндірушілер саналады, ал ауыл шаруашылығының тұрақты дамуы аймақтың азық-түлік қауіпсіздігі үшін маңызды. Сондықтан бұл жолғы кездесу ауыл шаруашылығы саласындағы өзара іс-қимылға жаңа серпін беретініне сенемін», – деді министр.

Ресейдің ауыл шаруашылығы өнімдері айналымында үлесі 30%-дан асады, сондықтан Қазақстанның АӨК саласындағы ең ірі сауда серіктесі болып қала береді.

Былтырғы жылы екі ел арасындағы жалпы сауда айналымы 3,7 млрд долларды құрады, бұл 2023 жылмен салыстырғанда тұрақты өсім көрсетті (3,6 млрд доллар). Биылғы жылдың алғашқы 9 айында сауда айналымы 3,3%-ға өсіп, 2,8 млрд АҚШ долларына жетті, сонымен қатар Қазақстаннан шығарылатын экспорт көлемі 9%-ға артты.

Тараптар тауар түрлерін кеңейту және жаһандық нарықтарда, соның ішінде дәнді дақылдар бойынша ынтымақтастықты тереңдету қажеттігін атап өтті.

Айдарбек Сапаров дәнді терең өңдеуді дамытуға, жоғары қосылған құнды өнім шығаруға арналған бірлескен кластерлер құруға қызығушылық танытты. Олар крахмал, глютен, аминқышқылдары, лизин және биоэтанол сияқты өнімдер.

«Бұл құжат Қазақстан Республикасы мен Ресей Федерациясының мүдделеріне сай келетін үйлестірілген сыртқы сауда стратегиясын әзірлеуге ықпал етеді деп сенемін», – деп атап өтті Оксана Лут.

Сонымен қатар, кездесуде жыл басында қол қойылған Ресей–Қазақстан агроөнеркәсіптік ынтымақтастық іс-шараларының негізгі тармақтары талқыланды.

Бүгінде Қазақстан мен Ресей 32 бірлескен ауыл шаруашылық дақылдарының сортын жасаған, оның 26-сы Мемлекеттік тіркеуге енгізілген. Майлы және көкөніс дақылдарын селекциялау бойынша белсенді жұмыс жүргізілуде, жануарлардың тұқымдық құндылығын бағалаудың заманауи әдістері енгізілуде.

А.И. Бараев атындағы Астық шаруашылығы ғылыми-өндірістік орталығы базасында «Kaz Agro Carbon» бірлескен көміртекті агроклиматтық полигоны құрылды. Жыл соңына дейін органикалық ауыл шаруашылығы бойынша желілік технопарк іске қосылады, ол бірлескен ғылыми жобалар үшін жаңа алаң болмақ.

Одан әрі министрлер Қазақстан - Ресей сыртқы саудасын дамыту стратегиясын әзірлеуді талқылады. Құжат үшінші елдер нарығына шығу және логистикалық бағыттарды үйлестірудің негізін қаламақ.

Кездесу иелері азық-түлік жеткізуді жеңілдету және ауыл шаруашылығы өнімдерін транзитпен үшінші елдерге экспорттау үшін қолайлы режимді қамтамасыз ету жұмысын күшейтуге уағдаласты.

Сондай-ақ, екіжақты шектеулерді жою бойынша жұмыс жалғасатын болады.

Кездесу нәтижесінде Қазақстан–Ресей агроөнеркәсіптік кешенді ғылыми-техникалық дамытудағы ынтымақтастық жоспары мен сыртқы сауданы дамыту бойынша екіжақты стратегияға қол қойылды.

• 11.12.2025
• 11