IV Бап бойынша миссия қорытындылары жөніндегі ХВҚ есебі: банк секторының орнықтылығы және реттеу реформаларындағы Қазақстанның прогресі

Халықаралық валюта қоры ХВҚ Жарғысының IV Бабына сәйкес Қазақстан Республикасымен консультациялар қорытындысы бойынша есеп жариялады. Әли Әл-Эйд мырзаның басшылығымен ХВҚ миссиясы 2025 жылғы 6-19 қараша аралығында Қазақстанның мемлекеттік органдарымен және ұйымдарымен бірқатар кездесулер өткізді.

ХВҚ бағалауы бойынша, Қазақстанның банк секторы алдыңғы кезеңдердегі тұтынушылық кредиттеудің жылдам өсуіне қарамастан орнықты, жоғары капиталдандырылған және өтімді болып қала береді. Жалпы алғанда, қаржылық тәуекелдер қалыпты, банк активтерінің сапасы қолайлы деңгейде сақталып отыр.

ХВҚ банктік қадағалауды нығайту, қаржылық қызметтерді тұтынушылардың құқықтарын қорғау жүйесін дамыту және қаржы нарығын реттеуді жетілдіру жөніндегі шараларды қоса алғанда, Қаржы секторын бағалау бағдарламасының (FSAP 2023) ұсынымдарын іске асырудағы прогресті оң тұрғыдан бағалайды.

Сонымен қатар, ХВҚ үй шаруашылықтарының борыш жүктемесінің өсуіне байланысты тәуекелдерді шектеуге бағытталған атаулы макро- және микропруденциялық шараларды жалғастыру қажеттілігін, сондай-ақ макропруденциялық саясатты одан әрі нығайтудың маңыздылығын атап өтті.

Сонымен бірге ХВҚ макроэкономикалық тұрақтылықты нығайтуға, инфляциялық қысымды тежеуге және орнықты әрі инклюзивті экономикалық өсуді қамтамасыз етуге бағытталған Үкіметтің, Ұлттық Банктің және Агенттіктің Бірлескен іс-қимыл бағдарламасы шеңберінде іске асырылып жатқан шараларды оң тұрғыдан атап өтіп, оларды дәйекті және үйлестірілген іске асырудың маңыздылығын атап өтті.

Басым бағыттардың қатарында ХВҚ Банктер туралы жаңа заңның қабылдануын, проблемалық банктерді реттеу тетігін қалыптастыру мен кезең-кезеңімен енгізуді, цифрлық қаржы активтерін реттеу мен қадағалауды дамытуды, сондай-ақ қаржы реттеушісінің институционалдық әлеуетін күшейтуді атап өтті.

Агенттік қаржы жүйесінің орнықтылығын арттыруға, қаржы нарығын дамытуға, қаржылық қызметтерді тұтынушылардың құқықтарын қорғауға және реттеу мен қадағалаудың үздік халықаралық стандарттарын енгізуге бағытталған құрылымдық реформаларды іске асыру жөніндегі жүйелі жұмысты жалғастырады.

• 30.01.2026
• 6