Еңбек министрлігінде «МАК» ӨСК» АҚ мен аумақтық департаменттердің қызмет қорытындылары талқыланды

ҚР Еңбек және халықты әлеуметтік қорғау министрлігінде ведомство басшысы Асқарбек Ертаевтың төрағалығымен өткен аппараттық кеңесте «Мемлекеттік аннуитеттік компания» өмірді сақтандыру компаниясы» АҚ-ның (бұдан әрі – «МАК» ӨСК» АҚ) және Еңбек министрлігі комитеттерінің аумақтық департаменттерінің 2025 жылғы қызмет қорытындылары қаралды.

Алғашқы баяндамашы болып «МАК» ӨСК» АҚ басқарма төрағасы Қуаныш Мұқажанов сөз сөйледі. Ол 2025 жылдың қорытындылары туралы баяндап, сондай-ақ ағымдағы жылға қойылған міндеттерге егжей-тегжейлі тоқталды.

Атап айтқанда, маңызды қадамдардың бірі ретінде қайта сақтандыру қызметін жүзеге асыруға лицензия алу көзделіп отыр. Бұл сақтандыру тәуекелдерін неғұрлым тиімді басқаруға, сақтандыру (қайта сақтандыру) сыйлықақыларының көлемін арттыруға және ұйымның қаржылық тұрақтылығын нығайтуға мүмкіндік береді. Сонымен қатар сақтандыру нарығындағы жекелеген өнім түрлерін дамыту, оның ішінде тұрғын үйді табиғи апаттардан сақтандыруды енгізу жоспарлануда.

Қуаныш Мұқажанов киберқауіпсіздікті арттыру, ішкі IT-жүйелерді дамыту, сондай-ақ клиенттер үшін ыңғайлы әрі түсінікті интерфейс қалыптастыру бағытындағы жұмыстардың жалғасып жатқанын да атап өтті.

Әрі қарай Маңғыстау облысы бойынша Халықты әлеуметтік қорғау саласындағы реттеу және бақылау комитетінің аумақтық департаменті басшысы Тимур Идрисов пен Шығыс Қазақстан облысы бойынша Мемлекеттік еңбек инспекциясы комитеті департаментінің басшысы Бақытбек Кизатов сөз сөйледі. Олар өз қызметтерінің негізгі бағыттары бойынша атқарылған жұмыстардың қорытындылары жөнінде баяндамалар жасады.

• 02.02.2026
• 6