Шыңғыс Әрінов өрт сөндіру бөлімдерін реновациялауды жалғастыруда: Ақсу-Аюлыда жаңа нысан ашылды

  Қазақстан Республикасының Төтенше жағдайлар министрі генерал-лейтенант Шыңғыс Әрінов Қарағанды облысының Ақсу-Аюлы ауылында жаңа үлгідегі өрт сөндіру бөлімін ашты. Бұл нысан ТЖМ елімізде кезең кезеңімен жүзеге асырып жатқан өртке қарсы және құтқару инфрақұрылымын реновациялау жобасының бір бөлігі болып табылады. Шет ауданы үшін бұл заманауи өрт сөндіру бөлімі тұрғындардың қауіпсіздігін күшейтіп, төтенше жағдайларға жедел әрекет ету уақытын қысқартуға мүмкіндік беретін маңызды қадам.

  Ашылу салтанатына облыс әкімі Ермағанбет Бөлекпаев, азаматтық қорғау органдарының ардагерлері және ауыл тұрғындары қатысты. Жаңартылған өрт сөндіру бөлімі 22 мыңнан астам халқы бар тоғыз елді мекеннің тұрғындарын қорғауды қамтамасыз етеді. Жаңа нысан 1967 жылы салынған, заманауи талаптарға сай келмейтін ескі өрт сөндіру бөлімінің орнына пайдалануға берілді. Ғимаратта жергілікті төтенше жағдайлар органдары қызметкерлеріне арналған әкімшілік кабинеттер де көзделген, онда олардың күнделікті қызметі жүзеге асырылады.

  Ашылу рәсімінде сөйлеген сөзінде министр құтқарушылардың тиімді жұмысы қызмет жағдайынан басталатынын атап өтті. Жаңа өрт сөндіру бөлімі тәулік бойы кезекшілікті қамтамасыз етуге арналған, оқу сыныптарымен, демалуға арналған үй-жайлармен, тұрмыстық аймақтармен, жарақ қоймаларымен, заманауи диспетчерлік жүйелермен, газ-түтін қорғау қызметі бекетімен және өрт-құтқару техникасына арналған кең бокстармен жабдықталған. Жеке құрамның дене даярлығын ұстау  үшін «Batyr team» спорт залы да көзделген.

  Ашылу барысында бөлімшелер практикалық тұрғыда күшейтілді. Ақсу-Аюлы бөлімінің қызметкерлеріне, сондай-ақ Теміртау, Қарқаралы және Осакаров аудандарының бөлімшелеріне жедел-құтқару автомобильдері мен батпақты жерлерде жүре алатын арнайы көліктердің кілттері табыс етілді. Сонымен қатар жобаны жүзеге асыруға үлес қосқан бірқатар мемлекеттік органдардың өкілдері мен өңірлік ТЖД қызметкерлері алғыс хаттармен марапатталды.

• 04.02.2026
• 6