Жезқазғанда Жоспарлау және жедел басқару орталығы ашылды

  Төтенше жағдайлар министрі генерал-лейтенант Шыңғыс Әрінов Ұлытау облысында күрделі жөндеуден өткен Төтенше жағдайлар департаментінің Жоспарлау және жедел басқару орталығын салтанатты түрде ашты. Жаңартылған нысан өңірдің азаматтық қорғау күштері мен құралдарын басқару жүйесінің негізгі элементіне айналды. Ашылу рәсіміне облыс әкімі Дастан Рысбеков және жергілікті атқарушы органдардың өкілдері де қатысты.

«Орталықтың ашылуы азаматтық қорғау жүйесін нығайту мен дамытуға көрсетіліп отырған мемлекеттік қолдаудың айқын үлгісі болып табылады. Заманауи технологиялар бізге тезірек, дәлірек және үйлесімді әрекет етуге мүмкіндік беріп, халықтың қауіпсіздігін қамтамасыз етеді», – деп ведомство басшысы атап өтті.

  Салтанатты рәсім басталар алдында іс-шараға қатысушылар қызметтік міндетін атқару кезінде қаза тапқан өрт сөндіру бөлімінің командирі Руслан Әбілдиновты бір минут үнсіздікпен еске алды. Оның құрметіне стела мен мемориалдық тақта ашылды. Еске алу шарасына оның туыстары — жұбайы мен қызы қатысты.

  № 7 мамандандырылған өрт сөндіру бөліміне жапсарлас салынған ғимарат толық реконструкциядан өтті. Орталық Төтенше жағдайлар министрлігінің Стратегиялық жоспарлау және жедел басқару орталығы негізінде әзірленген бірыңғай тұжырымдама бойынша құрылып, заманауи байланыс құралдарымен, цифрлық мониторинг және жедел ахуалды визуализациялау жүйелерімен жарақталды. Нысан қолданыстағы стандарттар мен талаптарға сәйкестендіріліп, азаматтық қорғау күштерін басқаруға арналған жоғары технологиялық платформа қалыптастыруға мүмкіндік берді.

  Мұнда жедел штабқа арналған функционалдық жұмыс аймақтары, ахуалдық зал, сондай-ақ барлық жүйелердің тәулік бойы үздіксіз жұмысын қамтамасыз ететін техникалық үй-жайлар қарастырылған. Жаңартылған орталық нақты уақыт режимінде ахуалды бақылауға, жедел шешімдер қабылдауға және азаматтық қорғау қызметтерінің өзара тиімді іс-қимылын ұйымдастыруға мүмкіндік береді.

  Іс-шара аясында құтқарушылар мен азаматтық қорғау жүйесін дамытуға үлес қосқан азаматтар ТЖМ және облыс әкімінің ведомстволық наградаларымен наградталды. Жаңартылған орталықтың іске қосылуы Қазақстан ТЖМ-нің материалдық-техникалық базасын нығайту және кез келген сын-қатерлер мен қауіптерге ден қоюға дайындық деңгейін арттыру бойынша жүйелі жұмыстың бір бөлігі болды.

  Нысанның ашылуы Ұлытау облысының азаматтық қорғау жүйесі үшін маңызды оқиға болып табылады және өңірдің төтенше жағдайлар қызметтерінің жұмысының тиімділігі мен жеделдігін одан әрі арттыруға бағытталған.

  Іс-шара бөлімше аумағында ағаш отырғызумен аяқталды. Бұл игі дәстүр болашаққа қосылған үлесті білдіріп, өңірдің дамуы мен абаттандырылуын айқындайды.

• 13.04.2026
• 6