46 жылдан кейін алғаш рет: ТЖМ басшысы жаңартылған «Медеу» диспетчерлік пунктін ашты

Алматыда «Қазселденқорғау» ММ филиалының «Медеу» диспетчерлік пункті жаңғыртудан кейін қайта ашылды. Нысан сел және гидрологиялық жағдайды, көшкін және қар көшкіні қаупі бар учаскелерді бақылауды, сондай-ақ инженерлік қорғаныс құрылыстарына қызмет көрсетуді қамтамасыз етеді. Кіші Алматы өзені бассейнін бақылау мамандарға табиғи қауіптерді уақтылы бағалап, қала тұрғындары мен аумағын қорғау шараларын қабылдауға мүмкіндік береді. Ашылу рәсіміне Қазақстан Республикасының Төтенше жағдайлар министрі генерал-лейтенант Шыңғыс Әрінов қатысты.

Пункт ғимараты 1980 жылы «Медеу» сел ұстайтын бөгеті құрылысы аяқталғаннан кейін салынған. Бастапқыда нысан бақылау пункті ретінде пайдаланылған. 46 жыл ішінде мұнда күрделі жөндеу жүргізілмегендіктен, ғимараттың техникалық жағдайы мен сыртқы қасбетін жаңарту қажет болды.

Жаңғырту барысында ғимараттың техникалық және эстетикалық жағдайы талапқа сай деңгейге келтіріліп, материалдық-техникалық базасы жаңартылды және мамандардың жұмыс істеуіне қолайлы жағдай жасалды. Жүргізілген жұмыстар Алматының инженерлік қорғау жүйесі үшін функционалдық әрі тарихи маңызы бар нысанды сақтап қалуға мүмкіндік берді. Пункттің «Медеу» бөгетінің тікелей жанында орналасуы қаланың туристер көп баратын танымал аумақтарының заманауи әрі абаттандырылған келбетін қалыптастыруға да ықпал етеді.

Жобаны іске асыруға және азаматтық қорғау жүйесін дамытуға қосқан үлесі үшін «Қазселденқорғау» қызметкерлері мен кәсіпкерлер ТЖМ-нің ведомстволық медальдарымен марапатталып, алғыс хаттармен атап өтілді.

• 26.08.2026
• 9