Қазақстан мен Мажарстан өткізу нарықтарын қайта бағдарлауға ниетті

2021 жылғы 6 сәуірде Сауда және интеграция министрі Бақыт Сұлтанов екі елдің сауда-экономикалық ынтымақтастығы мәселелерін талқылау үшін Мажарстанның Сыртқы істер және сыртқы сауда министрі Петер Сийяртомен кездесті.

Бүгінгі таңда Мажарстан Қазақстан үшін Шығыс Еуропадағы дәстүрлі маңызды және перспективалы сауда серіктесі болып табылады. Мәселен, 2020 жылдың қорытындысы бойынша сауда көлемі 9,7% - ға өсіп, $111,8 млн. құрады.

Бақыт Сұлтановтың пікірінше, елдер арасында әртараптандыру қажеттілігі туындайды. Қазақстан тарапынан өзара сауда үшін бірқатар ұсыныстар және жалпы сомасы $302 млн. болатын 45 өнім атауынан тұратын әлеуетті тауарлар тізбесі ұсынылды.

Сонымен қатар, Бақыт Сұлтанов Қазақстанда сұлы, зығыр, күнбағыс және дәрілік шөптер өсіруге бағытталған органикалық өнімдердің 60-тан астам өндірушісі бар екенін хабарлады. Кәсіпорындардың бір бөлігі қазіргі уақытта ЕО уәкілетті органдарында аккредиттеуден өтуде.

Қазақстан ЕО елдеріне жылына 10 млн. еуроға органикалық өнім экспорттайды. Бұл ретте, әлеует жылына 200 млн. еуродан астамды құрайды. ЕО-да органикалық өнімдерді тұтыну жыл сайын 20 млрд. еуродан асады.

Келіссөздер барысында тұтынушыларды қазақстандық және мажарстандық өндіріс өнімдерімен таныстыру үшін онлайн-форматта сауда миссияларын өткізу мүмкіндігі қарастырылды.

Бұдан басқа, Бақыт Сұлтанов Қазақстанның агроөнеркәсіптік кешенінің әлеуеті туралы хабарлады, сондай-ақ венгр тарапына стандарттар мен өнім сапасын өзара тану үшін тауарларды ғылыми зерттеуге және сертификаттауға қатысуды ұсынды.

Сондай-ақ, ведомство басшысы КТО және трансшекаралық сауда орталықтарын (ЦТТ) құра отырып, ұлттық тауар өткізу жүйесі желісін құру жөніндегі жоспарлар туралы айтып берді. Мажарстан тарапына Мажарстан инвестицияларын тарту үшін "Қорғас" ШЫХО әлеуетін пайдалану, сондай-ақ оны ҚХР нарығына көтерме-бөлшек экспорттау үшін алаң ретінде пайдалану ұсынылды.

Сонымен қатар, тараптар өнеркәсіп саласындағы ынтымақтастық әлеуетін, су ресурстарын басқару саласындағы ынтымақтастықты, сондай-ақ геология саласындағы қызығушылықты талқылады.

"Елдер арасында көлік сервистерінің тиімділігін, шектес нарықтарға шығу үшін логистикалық инфрақұрылымды өзара пайдалануды, сондай-ақ бірлескен жобаларды іске асыруды жолға қою қажет. Мажарстан үшін бұл Орталық Азия мен Қытай, ал Қазақстан үшін Шығыс және Орталық Еуропа елдері", - деді Б. Сұлтанов.

Естеріңізге сала кетейік, Қазақстанның транзиттік әлеуетін Мажарстан контейнерлік пойыздар құрамында Қытаймен экспорттық-импорттық өнімді жерүсті көлігімен жедел жеткізу үшін пайдаланады (тұрақты контейнерлік пойыздар Сиань, Шэньси және басқа Қытай қалаларынан, сондай-ақ Қазақстан мен Украина арқылы кері бағытта жүреді).

Сонымен қатар, бірлескен жобаларды іске асыру мақсатында Мажарстан тарапына Қазақстан мен Шығыс Еуропа елдері арасындағы сауданы дамыту үшін Қазақстан Республикасының Сауда өкілдігін құру ұсынылды.

 "Мажарстан Конституциясында тамақ құрамында гендік модификацияланған қоспалар болмауы керек деп жазылған. Сондықтан біз Мажарстаннан сатып алынған барлық өнімдердің қауіпсіз екендігіне кепілдік бере аламыз. Біз сертификаттау жүйесін үйлестіру қажет екендігімен келісеміз және біз Түркі кеңесі елдері қолданатын сертификаттарды өзара қағидаты бойынша мойындауға дайынбыз", - деп атап өтті Мажарстанның Сыртқы істер және сыртқы сауда министрі Петер Сийярто.

Сондай-ақ, Мажарстан тарапы елдер арасындағы сауданың өзара іс-қимылы үшін қаржы базасын қамтамасыз ету қажет екенін хабарлады және Еуразиялық Даму Банкіне қабылдау бойынша қолдау сұрады.            

Кездесу қорытындысы бойынша ҚР Сауда және интгерация министрі Бақыт Сұлтанов Қазақстан өткен жылы өз астанасында Түркі кеңесінің еуропалық бөлімшесін ашу арқылы Мажарстанның түркі әлеміне белсенді интеграциялануын қолдайтынын атап өтті, сондай-ақ Мажарстанның Түркі кеңесіндегі байқаушы мәртебесі Орталық Азия елдерімен де, ЕО елдерімен де ынтымақтастыққа оң әсер ететініне сенім білдірді.

• 07.04.2021
• 199