ТЖМ әскери бөлімінде инфрақұрылымды жаңарту жұмыстары жалғасады

Қарағанды облысына жұмыс сапары барысында Төтенше жағдайлар министрі Мұрат Мұханов Мартбек Мамраев атындағы №52859 әскери бөліміне барды.

Ведомство басшысы бөлімнің күнделікті қызметін ұйымдастыру барысымен, жеке құрамды орналастыру жағдайымен және инфрақұрылым нысандарының жай-күйімен танысты. Мұрат Мұханов казарма үй-жайларын, асхана мен тамақтану блогын аралап, әскери қызметшілердің тамақтануын ұйымдастыру тәртібін көрді.

  Жыл басынан бері әскери бөлімнің бөлімшелері 74 құтқару жұмысына жұмылдырылды. Әскери қызметшілер жеті адамды құтқарды.

  Министрге әскери бөлімнің жарақтандырылуындағы әскери және арнайы техника таныстырылып, оның қойылған міндеттерді орындауға дайындығы баяндалды.

  Бұған дейін әскери бөлімдегі казарма қоры күрделі жөндеуден өткізілді. Қазіргі уақытта бөлімнің инфрақұрылымын одан әрі жаңартуды көздейтін жөндеу жұмыстарының екінші кезеңі пысықталуда.

  Мұрат Мұханов мерзімді әскери қызметшілермен жеке кездесті. Ол олардың даярлығын ұйымдастыру барысымен және әскери қызмет кезеңінде кәсіби білім алу мүмкіндіктерімен танысты. Әскери қызметшілер запасқа шығарылғаннан кейін сұранысқа ие болатын мамандықты меңгере алады.

  Сапар барысында министр әскери бөлімді одан әрі дамыту және әскери қызмет өткеру жағдайларын жақсарту жөніндегі жоспарлармен танысты.

• 21.09.2026
• 4