ТЖМ басшысы «Долинный» кенішіндегі өнеркәсіптік қауіпсіздік шараларымен танысты

  Шығыс Қазақстан облысына жұмыс сапары барысында Төтенше жағдайлар министрі Мұрат Мұханов бастаған делегация алтын жерасты әдісімен өндірілетін «Қазцинк» ЖШС-нің «Долинный» кенішіне барды.

  ТЖМ басшысы жерасты тау-кен жұмыстарының ұйымдастырылуымен және өнеркәсіптік қауіпсіздікті қамтамасыз ету бойынша қолданыстағы шаралармен танысты. Өндірістік бақылауға, авариялық жағдайлардың алдын алуға және қауіпті өндірістік объектідегі қауіпсіздік талаптарының сақталуына ерекше назар аударылды.

  Сапар барысында персонал мен техниканың орналасқан жерін анықтау, аэрогаздық бақылау, соқтығысудың алдын алу, авариялық хабарлау және байланыс жүйелерінің заманауи үлгілері таныстырылды. Бұл технологиялар жұмысшылардың қай жерде жүргенін бақылауға, шахта ауасының жай-күйін қадағалауға және ықтимал қауіптерге уақтылы ден қоюға мүмкіндік береді.

  Делегация аварияларды жою жоспарларымен, кәсіби авариялық-құтқару қызметтерімен өзара іс-қимылды ұйымдастыру тәртібімен және ықтимал оқиғаларға ден қоюға дайындық деңгейімен де танысты. Өнеркәсіптік қауіпсіздікті қамтамасыз етуде қауіпті факторларды дер кезінде анықтау, авариялардың алдын алу, жұмысшылардың өмірі мен денсаулығын сақтау айрықша маңызға ие.

• 12.10.2026
• 5