Қостанай облысында төтенше жағдайлардың алдын алу шаралары талқыланды

  Қазақстан Республикасы Төтенше жағдайлар министрі Мұрат Мұханов Қостанай облысына жұмыс сапары барысында өңір әкімі Құмар Ақсақаловпен бірлесіп, халықтың қауіпсіздігін қамтамасыз ету мәселелері бойынша кеңес өткізді. Жиында су тасқыны кезеңіне дайындық, табиғи өрттердің алдын алу, өнеркәсіптік қауіпсіздік және құтқару инфрақұрылымын дамыту мәселелеріне баса назар аударылды.

  Кеңестің негізгі тақырыптарының бірі елді мекендерді көктемгі су тасқынынан қорғау болды. Жүргізілген инженерлік жұмыстар нәтижесінде 55 елді мекенді су басу қаупі жойылып, тағы 33 елді мекенде қауіп деңгейі төмендетілді. Су тасқынына қарсы іс-шаралар, оның ішінде қорғаныс құрылыстарын нығайту және алдағы маусымға дайындық жұмыстары жалғасуда. Сонымен қатар гидротехникалық нысандарды күтіп-ұстау және олардың қауіпсіз пайдаланылуын қамтамасыз ету мәселелері қаралды.

  Тоғыз ай ішінде облыстың өрт сөндірушілері мен құтқарушылары 3 мыңнан астам жедел шақыртуға шығып, 134 адамды құтқарды. Биыл бөлімшелерге 19 бірлік техника берілді. Тобыл қаласында өрт сөндіру депосының құрылысы аяқталып, Қарасу ауданындағы өрт сөндіру бөлімінің ғимараты қайта жаңғыртылды, бірқатар бөлімшенің ғимараттарына жөндеу жұмыстары жүргізілді. «Ауыл құтқарушылары» бағдарламасы аясында Свердлов, Клочково және Жамбыл ауылдарында жыл бойы жұмыс істейтін үш өрт сөндіру бекеті ашылды. Тағы 13 бекетті құру жұмыстары жалғасуда. Бұл шалғай елді мекендер тұрғындары үшін өртке қарсы қызметтің қолжетімділігін арттыруға мүмкіндік береді.

  Орман және дала өрттерінің алдын алу, оларды ерте анықтау, тұрғын үй секторындағы өрт қауіпсіздігі және жылыту маусымында иіс газынан улану жағдайларын болдырмау мәселелеріне ерекше назар аударылды.

  Қостанай облысының өнеркәсіптік әлеуетін ескере отырып, кәсіпорындарда қауіпсіздік талаптарының сақталуы, жабдықтардың техникалық жай-күйі және авариялық-құтқару қызметтерінің дайындығы қаралды. Қауіпті өндірістік объектілерге мемлекеттік қадағалау жүргізу және оларды техникалық қайта жарақтандыру жөніндегі жұмыстар жалғасуда.

  Күн тәртібіне су айдындарындағы қауіпсіздік және балалардың жазатайым оқиғаларға ұшырауының алдын алу мәселелері де енгізілді.

  Кеңес қорытындысы бойынша ТЖМ мен облыс әкімдігінің маусымдық төтенше жағдайларға дайындық, өртке қарсы инфрақұрылымды дамыту және құтқару бөлімшелерін жарақтандыру бағытындағы бірлескен жұмысының негізгі басымдықтары айқындалды. Оқиғалардың алдын алу және облыс тұрғындарының қауіпсіздігін қамтамасыз ету басты назарда қалады.

• 30.10.2026
• 3