Қазақстанда 317-ші «Ауыл құтқарушылары» ерікті өрт сөндіру бекеті ашылды

  Қазақстан Республикасы Төтенше жағдайлар министрі Мұрат Мұханов Түркістан облысы Сарыағаш ауданының Жібек жолы ауылында 317-ші ерікті өрт сөндіру бекетін ашты. Жаңа бөлімше ТЖМ-нің «Ауыл құтқарушылары» бағдарламасы аясында құрылды. Ол төрт елді мекеннің 15 мыңнан астам тұрғынын өрттен қорғауды қамтамасыз етеді.

  Бекеттің қызмет көрсету аумағына Жібек жолы, Диқан баба, Зортөбе және Сарқырама ауылдары кіреді. Ерікті өрт сөндірушілер үшін жеке құрам мен өрт сөндіру техникасын орналастыруға арналған, жалпы ауданы 300 шаршы метр болатын бір қабатты ғимарат салынды. Құрылыс жұмыстары жергілікті бюджет есебінен қаржыландырылды. Бекеттің ауылдық жерде орналасуы шақыртуларға жедел жетіп, өртті сөндіру жұмыстарына уақытылы кірісуге мүмкіндік береді.

  ТЖМ-нің «Ауыл құтқарушылары» бағдарламасы кәсіби өрт сөндіру бөлімдерінен шалғай орналасқан ауылдарда ерікті өртке қарсы құралымдар құруға бағытталған. Бұл жұмысқа ТЖМ мамандарының жетекшілігімен арнайы дайындықтан өткен жергілікті тұрғындар жұмылдырылады. Еріктілер өрт сөндіру техникасымен, қажетті жабдықтармен, жеке қорғаныс құралдарымен және радиобайланыспен қамтамасыз етіледі. Бұл оларға өрттің бастапқы кезеңінде өздігінен әрекет етіп, негізгі күштер келгенге дейін жалынның таралуын тежеуге мүмкіндік береді.

  Қазақстан ТЖМ жергілікті атқарушы органдармен бірлесіп, ауылдық өрт сөндіру бекеттерінің желісін кеңейтуді жалғастыруда. Бағдарлама елді мекендердің өзінде алғашқы жедел әрекет ету жүйесін қалыптастырып, көмек көрсету уақытын қысқартуға және шалғай ауыл тұрғындарының қауіпсіздігін арттыруға мүмкіндік береді.

• 13.11.2026
• 60