Микроқаржыландыру сегментіндегі 883 компания қызметіне лицензия алды

Құрметті қазақстандықтар!

2021 жылғы 1 қаңтардан бастап Қазақстанда микроқаржылық қызметті лицензиялау қолданылады. МҚҰ нарығын реттеу банктік емес сектордағы тәуекелдерді азайту, оның ашықтығын арттыру және қаржылық қызметтерді тұтынушылардың құқықтарын қорғау үшін енгізілді. 

Ағымдағы жылғы 1 сәуірдегі жағдай бойынша микроқаржыландыру нарығының 883 субъектісі, оның ішінде 178 микроқаржы ұйымы, 542 ломбард және 163 кредиттік серіктестік Агенттіктің микроқаржылық қызметті жүзеге асыруға арналған лицензиясын алды. Микроқаржылық қызметті жүзеге асыруға арналған лицензиясы бар ұйымдардың тізілімімен Агенттіктің ресми сайтында танысуға болады.

Лицензиялауды енгізу микроқаржы нарығы ұйымдарының жылдық тиімді сыйақы мөлшерлемесінің шекті мәндерін сақтауын бақылауды қамтамасыз етуге, олардың заңсыз қызмет және алаяқтық операциялар, қаржы пирамидаларының схемаларын жүргізуіне жол бермеуге мүмкіндік береді, сол арқылы нарықтан жосықсыз ұйымдарды шығаруға және тұтынушылардың құқықтарын қорғауға мүмкіндік жасайды деп санаймыз. 

Микроқаржылық қызметті лицензиялау қағидалары бухгалтерлік есепті автоматтандыруға, басшы қызметкерлердің іскерлік беделінің мінсіз болуына және біліктілігіне, МҚҰ-ға қатысушыларда алынбаған немесе өтелмеген соттылықтың болмауына, кірістерді заңдастыруға қарсы іс-қимыл саласындағы ақпараттық жүйеге қосылуға қойылатын талаптарды, үй-жайлардың қауіпсіздік стандарттарын көздейді. МҚҰ-ның орнықтылығын, ең төмен стандарттарды сақтау үшін қаржылық, техникалық құралдардың және қызметкерлердің болуын қамтамасыз ету үшін 2019 жылғы қарашада МҚҰ-ның жарғылық және меншікті капиталдарының мөлшеріне қойылатын талаптар белгіленді.        

ҚНРДА-ның лицензиясын алу үшін белгіленген мерзімде өтініш жасамаған не лицензия беруден бас тартылған микроқаржы нарығындағы жұмыс істеп тұрған ұйымдарға қатысты сот тәртібімен мәжбүрлеп қайта ұйымдастыру не тарату жөніндегі шаралар қабылданатын болады.

• 13.04.2021
• 281