құттықтау

Құрметті қазақстандықтар!

Қазақстан Республикасының Индустрия және инфрақұрылымдық даму министрлігі баршаңызды Жаңа 2020 жылмен құттықтайды!

Тарихтың еншісінде қалдырғалы отырған 2019 жыл бүкіл еліміз үшін, оның ішінде біздің министрлігіміз жауапты салалар үшін баянды жыл болды деп айтуға болады.

Ел экономикасын әртараптандырудың айқын бағдары ретінде айқындалған индустрияландырудың екінші бесжылдығын қорытындыладық. Бағдарлама аясында отандық өнеркәсіп саласында елеулі жетістіктерге қол жеткізілді. Көлік инфрақұрылымы саласында нақты жетістіктер болды. Республикалық және жергілікті автожолдар салу және жөндеу бойынша ондаған жобалар іске асырылып жатыр. Бірқатар учаскелерде жұмыстар аяқталып, халықтың игілігіне берілді. Азаматтық авиация саласында тұрақты өсім бар. Әуе жолымен тасымалданатын жолаушылар саны артып, «ашық аспан» режімі аясында жаңа рейстер ашылуда. Тұрғын-үй құрылысы саласы да орнықты даму үстінде. Жалға берілетін, шарттары жеңіл несиеге сатылатын баспана салуға ерекше көңіл бөлінді. Жастарға арнап үйлер салынып, алғашқы тобы жуырда ғана қоныс тойын тойлады. Жалпы 2019 жылы министрлік айналысатын барлық салада үлкен жұмыстар атқарылды.

Ал жаңа жылда одан да ауқымды міндеттер күтіп тұр.  Оның барлығын өздеріңіздің қолдауларыңызбен және сала қызметкерлерінің бірлескен күш-жігерінің арқасында табысты атқаратынымызға сенеміз.

Есігімізден еніп, төрге шыққалы тұрған жаңа жылымыз да  қуанышқа, шаттыққа, жақсы жаңалықтарға толы болсын.

Баршаңызды Жаңа жыл мерекесімен құттықтай отырып, дендеріңізге саулық, қызметтеріңізге табыс, отбасыларыңызға амандық тілейміз!

Қазақстан Республикасының Индустрия және инфрақұрылымдық даму министрлігі

• 31.12.2019
• 663