ҚОҚЫС ШАШСАҢ ҚҰТЫЛМАЙСЫҢ......

Жыл соңына дейін қала ішіндегі тазалықты бақылайтын экологиялық полицияның санын көбейтеміз. Көшелердің, аулалардың, кәсіпорындардың, ойын-сауық орталықтарының барлығы табалдырықтан бастап, төрге дейінгі тазалығына мән беруі тиіс.

Әрине, әкімдік қадағалауды күшейтеді. Бірақ, бұл іске тұрғындар жаппай түсінік танытпайынша іс алға баспайды. Тазалық, әрбір тұрғынның ішкі мәдениетінен басталады.

Қарапайым мысал келтірейік. Көшеде көлікпен кетіп бара жатып темекенің тұқылын немесе басқа ұсақ-түйек қалдықтарды ойланбай лақтыра салатындар көп. Шындығында, сол шашып кеткен қоқысты қарапайым еңбек адамдары күн сайын еңкейіп терімдейді. Сондықтан, өзіңіз тұратын қаланы және оның тазалығына жауапты қарапайым еңбек адамдарына құрметпен қарауды сұраймыз.

Тазалық-қала билігінің басты назарында. Күні кеше осы мәселе бойынша арнайы жиын өткіздім. Бұдан былай халық тарапынан дәл осы тазалыққа қатысты әлеуметтік желіде жазылатын және айтылатын шағымдар дәлел ретінде қабылданады. Соған сәйкес, кімді болмасын жазаға тартудан тайынбаймыз.
Сонымен қатар, қала көшелерін көгалдандыруға айрықша назар аударамыз. Әсіресе, гүл отырғызу жұмыстары жанданады. Шымкент-таза әрі көрікті қала болуы шарт.
Тағы да ескертемін. Бұдан былай қоқысты оңды-соңды шашқандар жазадан қашып құтылмайды. Бұл бағыттағы жұмысқа құзырлы органдар айрықша назар аударады. Жедел іс-шараларды жиі ұйымдастыруды және бейнебақылауды күшейтуді тапсырдым.

• 26.04.2021
• 211