Қазақстанда өмірді сақтандыру ұтымды ма?

2020 жылы қазақстандықтар өмірді сақтандыру жөніндегі компаниялармен 1,8 миллион шарт жасасыпты. Бүгінгі күні өмірді сақтандыру айтарлықтай танымал болуда, себебі ол мүліктік мүддені қорғап қана қоймай, сонымен бірге жинақтау құралы болып табылады. COVID-19 пандемиясы бүкіл әлемде өмірді сақтандыру қызметіне сұранысты арттырды, біздің еліміз де бұл қызметтен сырт қалмады.

ҚР Қаржы нарығын реттеу және дамыту агенттігінің деректері бойынша 2020 жылы қазақстандықтар өмірді сақтандыру жөніндегі компаниялармен 1,8 миллион, жылдың басынан бері – 341 мың шарт жасасыпты. Өмірді сақтандыру нарығы бойынша ақша айналымы 2020 жылы 197,9 миллиард теңге, 2021 жылғы екі айда — шарттарды бұзу шығыстарын есептегенде 46 миллиард теңгеден аса болды.

Өмірді не үшін сақтандырады және өмірді сақтандырудан қандай пайда бар?

Өмірді сақтандыру өзімізді және жақындарымызды алдын ала болжап білмейтін не бақылай алмайтын, мысалы, ауру немесе жазатайым оқиға сияқты жағдайлардың салдарынан қорғауға мүмкіндік береді. Орын алған оқиғалар отбасы бюджетіне әсер етуі және бізді ауыр өмірлік жағдайға тап келтіруі мүмкін. Өмірді сақтандыру осындай ауыр тәуекелдерден болатын салдарды әлсіретіп, өзіңіз немесе жақындарыңыз үшін қауіпсіздік жастықшасын жасауға мүмкіндік береді.

Бұдан басқа өмірді сақтандырудың жекелеген өнімдері банк депозиттері сияқты ақшаны жинақтауға және көбейтуге мүмкіндік жасайды. Сақтандыру нарығы ұсынып отырған өмірді жинақтау арқылы сақтандыру қаражатты ұзақ мерзімді мақсатқа, мысалы, балалардың оқуына жинақтауға мүмкіндік береді.

Осы жылдың басынан бастап жеке тұлғаның салық салынатын кірісінен жинақтаушы сақтандыру шарттары бойынша сақтандыру ұйымдары жүзеге асыратын, жеке тұлға сақтандыру төлемдерін төлеген сақтандыру төлемдері және үш және одан да көп жылғы мерзімге жасалған жинақтаушы сақтандыру шарты бойынша сақтандыру сыйлықақылары алып тасталады. Бұл сақтандырудың осы түрін инвестициялау үшін танымал құралға айналдырады.

Өмірді сақтандырудың ең танымал бағыттарын қарастырайық.

Өмірді классикалық сақтандыру

Сақтандырылушы қайтыс болған және (немесе) ол еңбекке қабілеттілігінен айырылған жағдайда, өмірді сақтандыру өнімі бойынша шарттың талаптарына байланысты сақтандыру төлемін жүзеге асыруды білдіреді. Бұл ретте сақтандыру өтемі ақшалай төлем түрінде де, тегін медициналық көмекті ұйымдастыру түрінде де жүзеге асырылуы мүмкін.

Сақтанушы келісілген мерзім ішінде бір жарна төлеуге немесе оны тұрақты төлеуге міндетті болады.

Сақтандырудың осы түрінің тағы бір кең тараған өнімі қарыз алушының өмірін сақтандыру болып табылады, мұнда қарыз алушы көзделмеген жағдайға тап болған кезде кредит бойынша негізгі борыш сомасы сақтандыру шарты бойынша төлемдердің есебінен өтеледі және оның жақын туыстарына ауыртпалық салмайды.

Өмірді жинақтау арқылы сақтандыру

Шетелде жинақтау арқылы сақтандыру – бұл өмірдегі норма, адамдардың өмірін және денсаулығын қорғаудың маңызды құралы, ол инвестицияларға арналған құрал ретінде сәтті пайдаланылады.

Сақтандыру шартының қолданыс мерзімі ішінде клиент өзін барлық ықтимал тәуекелдерден сақтандырады және сонымен қатар қаражатты инвестициялау мүмкіндігіне ие болады. Сақтандыру компаниясы өзінің клиенттерінің жарналарын және өзінің қаражатын түрлі қаржы құралдарына салады, осыған байланысты клиенттердің сақтандыру компаниясының пайдасына қатысу немесе инвестициялық кіріс алу мүмкіндігі бар.

Unit linked сақтандыру өнімі жинақтау арқылы сақтандырудың үлгісі бола алады. Бұл екі қызметтің түрі – инвестициялардан және өмірді сақтандырудан тұратын инвестициялық өнім.

• 27.04.2021
• 334