Қазақстандық тауарлардың Норвегия мен Швейцарияда тарифтік артықшылықтары бар

Қазақстан Норвегия Корольдігі мен Швейцария Конфедерациясында преференциялардың бас жүйесі шеңберінде тарифтік преференциялар алуға құқылы. Яғни, бұл қазақстандық өндірілген тауарлардың кейбір түрлеріне басқа елдер үшін белгіленгеннен гөрі импорттық кедендік баждардың неғұрлым төмен мөлшерлемелері салынатынын білдіреді.

Осы жылы Норвегия мен Швейцария преференциялардың бас жүйесі шеңберінде Еуропалық Одақтың REX-System экспорттаушыларының тіркелген жүйесін (REX жүйесі) қолдана бастады. Енді «А» нысанындағы шығу тегі сертификаттарының қағаз нұсқаларының орнына тауарлардың шыққан елін растау үшін REX жүйесінде тіркелу қажет.

Экспорттаушыларды REX жүйесінде тіркеу тәртібі Қазақстан Республикасы Сауда және интеграция министрінің 2021 жылғы
31 наурыздағы № 244-НҚ бұйрығымен бекітілген Тауардың шығарылған елін растау мақсатында тауарды әкелетін елдердің ақпараттық жүйелерінде экспорттаушыларды тіркеу қағидаларында (бұдан әрі – Қағидалар) көзделген.

Жүйеде тіркеу, тіркеуді кері қайтарып алу жағдайын қоспағанда, тіркеу нөмірін бере отырып, бір рет жүзеге асырылады.

Норвегия мен Швейцарияға тауарларды әкелу кезінде тарифтік преференцияларды алу үшін қазақстандық экспорттаушы коммерциялық құжатта тауардың шығу тегі туралы өтінішті (экспорттаушының атауын және толық мекенжайын, тауардың шығарылған елін, тауарды әкелу елін, өнімнің/тауардың сипаттамасын және шығарылған күнін, тауарды жеткілікті қайта өңдеу өлшемін, үйлестірілген жүйе кодын көрсете отырып) дербес жасайды. Тауардың шығарылуы туралы өтініш қазақстандық тауарларға тарифтік преференциялар беру үшін негіз болады.

Тауардың шығарылуы туралы өтініште, егер тауарлар партиясының құны шекті мәннен 10 300 (он мың үш жүз) швейцар франкінен немесе 60 000 (алпыс мың) норвег кронынан асып кетсе, экспорттаушының тіркеу нөмірі де көрсетіледі.

Егер тауарлар партиясының құны шекті мәннен төмен болса, онда экспорттаушы тауардың шығу тегі туралы өтінішті REX жүйесінде тіркеусіз жасайды.

Қазақстандық экспорттаушыларды REX жүйесінде тіркеуді «Атамекен» Ұлттық кәсіпкерлер палатасы аталған Қағидаларда көзделген нысан бойынша экспорттаушының өтініші негізінде жүзеге асырады.

• 26.05.2021
• 176