Жастардың болашағы зор!

Қаламыздағы 140 мектептің 8 569 оқушысынан 536 команда жасақтау, күнделікті ауыр жаттығулар, 3 ай бойы тынымсыз тер төгу, командалық рух қалыптастыру, мектебіңнің абыройын асқақтатып, жеңіс тұғырынан табылу,
20 млн. жүлдеге қол жеткізу – жеңімпаз командаларға оңайлықпен келген жоқ.

Жеңіс жолындағы әр сайыс сайын күш-жігеріңді сарп ету, қарсылас команданың әлсіз тұсын анықтау, оны ұту, мықтылығыңды дәлелдеудің жеңіл болмағаны да рас.
Жас буынның бос уақытын ұтымды үйлестіру, оқушылардың әлеуетін пайдалы іске бағыттау, салауатты өмір салтын насихаттау бағытында «Шымкент Жастар Лигасы» игі бастама екенін дәлелдеді. Үш ай бойы күнделікті сабақпен бірге сайысты қатар алып жүруге шыдамдылық танытқан жас өскіннің алда спортты жанына серік етері сөзсіз.
Алаңда ауызбірлік көрсету, мықтыны мойындау, сүрінгенді демеу, жанкүйердің үмітін ақтау, мектебіңнің намысын қорғау – жастар лигасы көздеген тәрбиелік бағыттың бір парасы.
Ал, жеңімпаз команданың мектебіне берілетін 20 млн. теңге білім ордаларының мүмкіншіліктерін арттыруға сеп болары сөзсіз. Чемпион шығарған мектептер жүлде қорын жаратуда да оң шешім қабылдайды деп білемін.
Биыл пилоттық жоба ретінде қолға алынған «Шымкент Жастар Лигасы» көздеген мақсатына жетті. Жастарды жаппай спортқа баулуда жақсы бастама. Алдағы уақытта сайысты игі дәстүрге айналдырамыз деген ойдамын.
Осы орайда, жобаны іске асыруға үлес қосқан оқушылар мен мұғалімдерге және бастамаға қаржылай қолдау жасаған жандарға алғысымды айтамын!

• 02.06.2021
• 239