Екі қазақстандық банкке жасалған кибершабуыл туралы

Құрметті қазақстандықтар!

Қазақстан Республикасының Қаржы нарығын реттеу және дамыту агенттігі қаржы ұйымдарының киберқауіпсіздігі мәселелерімен тұрақты түрде айналысады.

2019-2020 жылдары қаржы реттеушісінің қызметкерлері Қазақстанның екі банкіне жасалған кибершабуылдар фактілері бойынша қылмыстық істі тергеп-тексеру кезінде Алматы қаласының прокуратурасына көмек көрсетті. 2 млрд теңгені ұрлаған «Карбанак/Кобальт» трансұлттық киберқылмыстық ұйымының мүшелері қазіргі кезде сотталды, Алматы прокуратурасы Агенттіктің көмегімен қылмыскерлер әрекетінің жүйелілігін қалпына келтіріп, қажетті дәлелдер базасын жинақтай алды.

«Карбанак/Кобальт» трансұлттық киберқылмыстық тобының жоғарыда көрсетілген қылмысты жасау кезінде 13 елдің аумағында әрекет еткені және 2 млрд теңгеден аса жымқырғаны, сондай-ақ тағы 8  млрд теңгені ұрлауға сәтсіз әрекет еткені анықталды. Қылмыстық ниет бірнеше кезеңмен іске асырылған: банктерге зиянды файлдар салынған электрондық хаттар жіберілген, оларды ашқан кезде компьютерлер бір-бірін зақымдаған. Хакерлер қашықтан басқару режимінде банк қызметкерлерінің құпиясөздерін ұрлау үшін бағдарламалар орнатқан, 200-ден аса төлем картасын ашқан, банктердің процессинг жүйелеріне рұқсатсыз әкімшілік тұрғыдан қол жеткізген. Одан кейін төлем карталарына көп миллионды кредиттік лимиттер белгілеген, банкоматтардан қаражат алуға қойылған шектеулерді алып тастаған, одан әрі қаражат түрлі елдердегі банкоматтар арқылы қолма-қол ақшаға айналдырылған.

Трансұлттық қылмыстық ұйым әлемнің 40-тан асқан елінде ұрлықпен айналысқан, олардың қызметінен болған шығын шамамен 1 млрд долларды құрайды.

Прокуратура мен Агенттіктің бірлескен қызметінің нәтижесінде материалдар дайындалып, Алматы қаласы Бостандық аудандық сотына берілді және қылмыстық топтың екі қатысушысына қатысты айыптау үкімі шығарылды. Сот оларға 8 жыл бас бостандығынан айыру түрінде жаза тағайындады. Қылмыстық топтың қалған мүшелері анықталып, оларға халықаралық іздеу жарияланды.

• 08.06.2021
• 288