Халық алдындағы есептік кездесудің қорытындысы

Онлайн форматта халық алдында есеп беру кездесуін өткіздім. Өткен жыл мен биылғы 5 айдың ішінде біз қоршаған ортаны қорғауға қатысты бірқатар маңызды басты бастамаларды қолға алып, біраз мәселелерді шеше алдық. Жаңа Эко-кодекс, «Waste to Energy» қалдықтарды энергетикалық кәдеге жарату тетігін енгізу жөніндегі заң және балық шаруашылығын дамытудың 2030 жылға дейінгі бағдарламасы қабылданды. Сондай-ақ, “Жануарларға жауапкершілікпен қарау туралы» заң жобасы әзірленді. Ал дәл қазір жаңа Су кодексінің тұжырымдамасы және 2021-2025 жылдарға арналған геология саласын дамытудың ұлттық жобасы дайындалып жатыр. Еліміздің барлық аумағында киіктерді атуға шектеу 2023 жылға дейін ұзартылды. 2 жыл ішінде Қазақстандағы киіктердің саны 334 мыңнан 842 мыңға дейін өсті. Қоршаған ортаны жақсарту мақсатында 17 Жол картасы бекітілді. Бірқатар ірі компаниялармен ауаны ластаушы заттар шығарындыларын азайту туралы келісімге келдік. 80,5 миллион ағаш отырғызылды және заңсыз кескендерге жаза күшейді. Өткен жылы 53,5 мың га суармалы жер айналымға енгізілді, биыл тағы 78 мың га жоспарланып отыр. 12 апатты су қоймасы пайдалануға берілді, биыл тағы 8 су қоймасы қалпына келтіріледі. Түркістан облысында «К-19» магистралды каналын цифрландыру бойынша пилоттық жоба іске асырылды. Жыл соңына дейін 16 арнаны цифрландырамыз. Бүгінгі кездесуге уақыт тауып қатысып, белсенді түрде сұрақ қойған әр азаматқа алғыс айтамын. Өзекті деген экологиялық мәселелерге назар салып, қоршаған ортаға қамқор болу - бәріміздің парызымыз.

• 15.06.2021
• 257