Микрокредиттермен алаяқтық операцияларға жол бермеу туралы

Құрметті қазақстандықтар!

Агенттік 2020-2021 жылдары микроқаржы ұйымдары берген жалған кредиттерге мониторинг жүргізді. 2021 жылдың басынан бастап микрокредиттермен алаяқтық операцияларды болдырмау мақсатында қадағалау шаралары қабылданды.

Біріншіден, 2021 жылғы ақпанда Агенттік МҚҰ-ға қатысты микрокредитті биометриялық сәйкестендірусіз немесе электрондық цифрлық қолтаңба арқылы сәйкестендірусіз электрондық тәсілмен беруді тоқтатуға нұсқама берді. Бұған қосымша зардап шеккен азаматтарды қорғау үшін МҚҰ алаяқтық тәсілмен алынған микрокредиттер бойынша сыйақы мен айыпақы есептеуді тоқтатты. Бұл оқиғалар туралы ақпарат зардап шеккен қазақстандықтардың кредиттік тарихын түзету үшін кредиттік  бюроға жіберілді.

Мұнымен қоса, 2021 жылғы наурызда Агенттік онлайн-қарыз беретін барлық МҚҰ-ны клиенттің өзі екендігін нақты тексеруді және растауды, оның деректерін өтінімде көрсетілген деректермен салыстыруды, клиенттің нақты биометриялық деректерінің жеке басын куәландыратын құжаттарда көрсетілген деректерге сәйкестігін қамтамасыз етуді, сондай-ақ клиенттің микрокредит алуға ерік білдіруін тіркеуді міндеттеді. Қабылданған шаралар 2021 жылдың 4 айында өткен жылдың ұқсас кезеңімен салыстырғанда жалған микрокредиттер беру жағдайлары санының 3,6 есеге төмендеуіне ықпал етті.

Микрокредиттер беруде алаяқтыққа жол бермеу үшін жүйелі негізде Агенттік ағымдағы жылғы 30 сәуірде онлайн-микрокредиттер беру кезінде қарыз алушыларды сәйкестендірудің жаңа тәртібін енгізді. Енді қарыздарды алу үшін азаматты сәйкестендіру тек электрондық цифрлық қолтаңба арқылы не Қазақстан Республикасы Ұлттық Банкінің сәйкестендіру деректерімен алмасу орталығының сервисін пайдалана отырып, биометриялық өлшемдерге сәйкес келу немесе жеке деректерді және қарыз алушының бейнесін нақты уақыт режимінде екі факторлы тексеру арқылы жүзеге асырылуы мүмкін.

МҚҰ микрокредит беру құпиясын құрайтын ақпаратқа рұқсатсыз қол жеткізу анықталған жағдайда екі жұмыс күні ішінде себептер мен салдарларды жою үшін шаралар қабылдауға міндетті екенін ашық атап өткен жөн.

• 16.06.2021
• 325