Қаржы реттеушісі мамырда МҚҰ-ға және банкке шаралар қолданды

Құрметті қазақстандықтар!

ҚР Қаржы нарығын реттеу және дамыту агенттігі 2020 жылғы сәуірден бастап халықпен өзара іс-қимыл жасайтын қаржы және өзге де ұйымдардың жарнамалық қызметіне алаяқтық және басқа да заңсыз іс-әрекеттердің мүмкіндігі тұрғысынан жүйелі түрде мониторинг жүргізуде.

Реттеуші ай сайынғы мониторинг қорытындыларын ресми сайтта жариялайды. Ағымдағы жылғы мамырда мониторинг нәтижелері бойынша «Altyn Bank» АҚ-қа қатысты жарнамада банк лицензиясының нөмірі және осы лицензияны берген органның атауы көрсетілмегені үшін қадағалап ден қоюдың ұсынымдық шарасы қолданылды.

«Сенімді Іргетас» ломбарды», «Астана Ломбард-9» ломбарды», «Пегас люкс» ломбарды» ЖШС-ге, «CreditSun» МҚҰ, «MyCar Finance» МҚҰ-ға қатысты ҚР заңнамасының талаптарына сәйкес келмейтін шарттарды тексеру нәтижелері бойынша жазбаша ұйғарым жасалды. «ОнлайнКазФинанс» микроқаржы ұйымына жылдық тиімді сыйақы мөлшерлемесін дұрыс көрсетпегені үшін 145 850 теңге айыппұл салынды.

Агенттік ағымдағы жылғы мамырда бағалы қағаздар нарығының және сақтандыру нарығының субъектілеріне  қатысты бұзушылықтарды анықтаған жоқ. Қаржы ұйымдарының жарнамалық қызметі мониторингінің көздері мыналар болып табылады:

• қаржы және өзге ұйымдардың Агенттікке ұсынған, оның ішінде Агенттіктің сұратуы бойынша құжаттар мен ақпарат;
• жеке және заңды тұлғалардан, мемлекеттік органдардан келіп түскен өтініштер, құжаттар мен ақпарат;  
• қаржы және өзге ұйымдардың сайттары;
• Facebook, Twitter, Instagram, «ВКонтакте», Telegram әлеуметтік желілері;
• қаржы және өзге ұйымдардың мобильдік қосымшалары;
• теле-, радиоарналардағы, қоғамдық көліктегі, мерзімді баспасөз басылымдарындағы жарнама, сондай-ақ сыртқы жарнама.

Мониторинг Нұр-Сұлтан, Алматы, Шымкент қалаларында және Қазақстанның облыс орталықтарында жүргізілді.

• 18.06.2021
• 333