Қазақстандық экспорттаушыларға еуропалық нарыққа шығуға бірегей мүмкіндік туыр отыр

Үстіміздегі жылғы 25 мамырда «Қазіргі жағдайда Қазақстаннан Еуропа нарығына экспорттау» тақырыбында вебинар өтті. ҚР-дың Франциядағы Елшілігі, ҚР Сауда және интеграция министрлігі мен «Advantage Central Asia» француз компаниясы бірлесе ұйымдастырған шараға 60-тан астам қазақстандық кәсіпорындар мен түрлі бірлестіктердің өкілдері қатысты.

Вебинарды ашқан ҚР-дың Франциядағы Елшісі Жан Ғалиев екіжақты сауда-экономикалық ынтымақтастықты дамыту туралы айтып, тез өзгеріп жатқан әлемде Қазақстан экспортының құрылымын әртараптандыра және тауарларды өңдеу өнеркәсібіне баса назар аударып, жаңа жағдайларға бейімделудің маңызды екенін атап өтті.

Өз кезегінде, ҚР Сауда және интеграция Вице-министрі Қайрат Төребаев отандық экспорттаушыларды қолдау бойынша Қазақстан Үкіметі қабылдаған кешенді шаралар туралы, сонымен қатар Еуропалық Одақ кеңістігінде сұранысқа ие болуы мүмкін қазақстандық тауарлардың әлеуеті туралы айтып берді.

«Advantage Central Asia» компаниясының Бас директоры Дмитрий Родин пандемия кезіндегі Еуропа мен Францияның азық-түлік нарықтарындағы өзгерістер, сертификациядан өту, қаптама мен таңбалауға қойылатын талаптар, шекарадағы шектеулер туралы өзекті ақпарат берді. Француз сарапшысының айтуынша, қазір қазақстандық экспорттаушылардың Еуропалық нарыққа шығуға бірегей мүмкіндігі туып отыр. Сонымен бірге, еуропалық нарықтағы жетістік өнімді жеткізу жылдамдығына, олардың бәсекеге қабілеттілігіне және сертификаттау рәсімдерінің тиімділігіне байланысты болады.
«ECTI» қауымдастығының (Франция) ТМД елдері бойынша жетекшісі Жан-Ги Мютэз тамақ өнеркәсібі саласындағы француз кәсіпорындарының қазақстандық өнімді экспорттау бойынша ынтымақтастыққа дайын екендігін растады.

Баяндамалардың қорытындысы бойынша спикерлер отандық кәсіпкерлердің сұрақтарына жауап беріп, қазақстандық өнімді еуропалық нарыққа шығару бойынша алдағы іс-шаралар алгоритмін талқылады.

• 26.05.2020
• 420