Қала инфрақұрылымын дамыту – бірінші кезектегі мәселе.

Шымкенттің 75 пайызы жеке үй секторынан тұрады.
81 елді мекеннің 41-і – қалаға жаңадан қосылған ауылдық аумақтар.
Бүгiнде осы тұрғын алаптарда қалалық ортаны қалыптастыру оңай шаруа емес. Сапалы жол, коммуналдық игіліктермен қамту күн тәртiбiнде тұрған өзектi мәселелер қатарында. Инженерлік желілер құрылысы барысында жерге орналастыру тәртібінің сақталмауы, жылжымайтын мүлікке меншік құқығының рәсімделмеуі мен заңсыз құрылыстар cынды кедергілер жиi кездеседі.

Дегенмен осы проблемаларды заң аясында шешу, инфрақұрылым жүйелері құрылысын бекітілген мерзімде аяқтау керек.

Қабылдауыма жазылған азаматтардың көбісі үй құрылысын жүргізуге жер бөлуді сұрайды.

Инженерлік желілері жоқ жерлерге құрылыс салуға болмайды. Барлығы жүйелі, рет-ретімен атқарылуы тиіс. Заңсыз салынған үйлердiң тұрғындары уақыт өте су, газ, электр қуаты, жол, интернет, мектеп, балабақша, емхана талап ете бастайтыны анық. Ал қазір қаламызға жаңадан қосылған елді мекендердің инфрақұрылым мәселелерін шешу бірінші кезекте тұр.

Ауыз су бойынша биыл 3 магистралды және 10 елді мекеннің ішкі жүйелері, кәріз жүйелері бойынша 3 магистралды және 16 ішкі орамдық нысандар, табиғи газ бойынша газ тарату станциясы, 2 магистралды, 7 елді мекеннің ішкі газ құбырлары, электр энергиясының сапасы бойынша 3 подстанция және 15 елді мекеннің ішкі жүйелері салынуда.
2023-2025 жылдарда барлық елді мекендердің коммуналдық мәселелері түпкілікті шешіледі.
Қала жолдарының жалпы ұзындығы 3 мың шақырымнан асады. Жолдардың 37 пайызында асфальт жабындысы жоқ. Биыл 163 көшеде күрделі және орташа жөндеу жұмыстары басталды. Қанағаттанарлық жағдайдағы жолдардың үлесін 64 пайызға жеткізу көзделген.
Транспорттық инфрақұрылым бойынша 4 жолайрық құрылысын жүргізу жоспарланған. Оның ішінде 2 нысан биыл пайдалануға беріледі.

Қорыта келер болсақ, инфрақұрылым жұмыстары болашақта пайда болатын тұрғын алаптарын қамтыған кезден бастап жер телімдері беріле бастайды.

• 22.07.2021
• 369