Қаламыз жасанды интеллект әлеміне алғашқы қадамын жасады.

Бұл бағыттағы жоспарларымыз ауқымды.
Қазір қала көшелеріне 2500-ге жуық бейнебақылау камералары қойылған. Биыл қосымша 3700 камера орнату жоспарланған. Оның ішінде 1500 данасы тұрғын үй аулалары мен қоғамдық орындарға қойылады.

Көздегеніміз – айыппұл салу емес. Мақсат – өмір сапасын жақсарту үшін технологиялар мүмкіндігін қолдану. Камералар ең алдымен қала қауіпсіздігі үшін қызмет етеді.
Тәртіп орныққан жерде өркендеу болады. Жол қауіпсіздігін сақтауға, ортақ мүлкіміздің қорғалуына, айналамыздың таза болуына, көгалды ресурсымызды қадағалауға мүмкіндік береді.

Құқықбұзушылықтың кез келген түріне «нөлдік төзімділік» атмосферасын қалыптастыруға, құқықтық мәдениетті орнықтыруға ықпал етеді.
Технологиялық құрылғылар қала тіршілігін тиімді ұйымдастыруға көмек көрсетеді. Транспорттық кептелістерді дер кезінде реттеп отыруға, қоғамдық көліктер қозғалысы мен бағдаршамдар қызметін автоматтандыруға жәрдемдеседі.

Алдағы уақытта қаламыздағы барлық цифрлы технологиялар бір арнаға интеграцияланып, қаланың электронды маршруттық картасы, интеллектуалды көлік жүйесі, қала инфрақұрылымының автоматтандырылған кешені, білім беру ұйымдарының технологиялық қауіпсіздік жүйелері, жасыл желек қорының электронды базасы қалыптасады, қоғамдық орындар мен тұрғын үй аулаларының тазалығы тәулік бойы бақылауға алынады.
Цифрлы технологияларды қолдану – дәуір талабы. Қазірдің өзінде бірқатар елдерде интеллектуалды камералардың көмегімен азаматтардың психологиялық көңіл-күйі өлшенеді. Көмекке зәру адамдарға мамандар көмегі дер кезінде жетеді. Азаматтарға осындай мүмкіндіктер жасау – саладағы жұмыстың бағдары болуы тиіс.

Бес жылдық даму жоспарымызда «Шымкент – тұрғындарға қолайлы қала» идеясын жүзеге асыруды белгіледік. Ол үшін цифрлы технологияларды тұрмысымызға кезең-кезеңімен енгізетін боламыз.

• 22.07.2021
• 348