Біз қаланы жайлы, ыңғайлы ету және көгалдандыру жұмыстарын жүргізіп жатырмыз!

Біз қаланы жайлы, ыңғайлы ету және көгалдандыру жұмыстарын жүргізіп жатырмыз! Елордада қала тұрғындарының таза ауада демалуына арналған көрікті орындар қатары көбеюде: қоғамдық кеңістіктер (саябақтар, гүлзарлар, желекжолдар) мен аулаларды абаттандыру бойынша ауқымды жұмыстар жүріп жатыр. Биылғы абаттандыру маусымында 150 аула мен 40 қоғамдық кеңістік қамтылады. Олардың кейбірі аяқталды.
Абаттандыру кезінде басты назарды қаланың ескі бөлігіне және тұрғын үй массивтеріне аударамыз. Бүгін Байқоңыр ауданында салынған бірқатар ауланы аралап шықтым. Онда аулаларды өзара біріктіретін ерекшеліктері бар: осылайша балалар мен үлкен кісілердің демалуы үшін көбірек орын жасай отырып, бірнеше ауланы абаттандырамыз.
✅ Мысалы Байқоңыр ауданында 50 ауланы абаттандырамыз! Оның ішінде Алатау шағын ауданының өзінде 9 үлкен аула абаттандырылды. Аулаларымыздың бәрі көпфункциялды болып келеді: балалар үшін де, үлкен кісілер үшін де. Футбол алаңдары, жаттығу орындары, бүлдіршіндерге арналған тұстар, демалуға арналған тыныш аймақтар қарастырылған. Сондай-ақ, иттерді серуендетуге арналған орындар ашуға да назар аударамыз.
✅ Бүгін Республика даңғылының бойындағы (Самал шағын ауданынан Бөгенбай батыр даңғылына дейін) қоғамдық кеңістік құрылысының барысымен таныстым. Біз аумақты жұртшылыққа кедергі тудырмайтындай етіп жасаймыз. Бұл мүмкіндігі шектеулі жандардың адам көп жүретін даңғылдардың бірінде еш қиындықсыз жүруі үшін жасалып отыр. Сол сияқты көлеңкелі шатырлар, әткеншектер, шағын архитектуралық мүсіндер орнатылады. Бұл аумақ жаппай көгалдандырылады. Сонымен қатар, қала тұрғындары жүретін тротуар аумағы («Республика Плаза» ауданында) ұлғайтылды.
✔️ Мәселен былтыр 76 гектардан астам жер абаттандырылды. Осылайша 150-ден астам аула мен 60 қоғамдық кеңістік (саябақтар, гүлзарлар, желекжолдар) қамтылды. Елорданы «Нұр-Сұлтан – жайлы қала» мастер-жоспары аясында дамытудамыз.
Мемлекет басшысының тапсырмасы бойынша аулаларды абаттандыру кезінде көгалдандыруға да ерекше көңіл бөлеміз. Биыл 1 млн-нан астам жасыл желек (бұталар, ағаштар, көшеттер) отырғызамыз. Осылайша қаламызда экологиялық аумақтар қатары көбейіп жатыр.

• 11.08.2021
• 252