Әлемдегі барлық мегаполистерде құрылыс компаниялары инвестиция үлесін арттыруға ұмтылады.

Өзара бәсекеде үздік жобалар іріктеліп, рационалды таңдау нәтижесінде іске асады.

Шымкент қаласында бұл нарық жаңадан қалыптасуда. Осыдан 4-5 жыл бұрын қаладағы құрылыстардың барлығы бюджет есебінен жүргізілсе, қазір жеке инвестицияның үлесі артты.

Бизнес баспана салумен қатар, әлеуметтік нысандардың: аурухана, емхана, мектеп, балабақша, спорт кешендерін салуға мүдделі болып отыр.

Компаниялардың имиджі, іскерлік беделі сыналатын шақ – құрылыс сапасы. Құрылыс жүргізуде немесе жөндеу жұмыстары барысында азаматтар беймезгіл уақыттағы артық шудан, экологиямыз қасақана зиян келуден зардап шегіп жатады. Құрылыс компанияларының тұрғындарға құрметпен қарауын, қоршаған ортаға жауапкершілікте болуын үйлестіретін құрылыс мәдениетін жетілдіретін кез келді деп білемін.

Қаламызда 58 тұрғын үйдің құрылысын жеке компаниялар іске асыруда. Тағы 33 үйді құрылыс басқармасының мердігер ұйымдары тұрғызуда.
Құрылысты жаңа арнамен ұйымдастыру міндеті тұр. Бұл сапа стандартын, құрылыстың үлгілік мәдениетін енгізуге үлкен мүмкіндік.

Құрылыстың артуы қадағалау тәсілдерін жетілдіруді талап етеді. Солардың бірі- камералардың көмегімен өндірістік кестенің сақталуын бақылайтын боламыз.

Құрылыс жоспарға жүгінетін сала. Қазір қаланың Бас жоспары дайындалуда. Құжатта аумақтық жайғастыруды жүйелендіріп, құрылыс жүргізілетін жерлерді белгілеп отырмыз. Жоспарлы жұмыс қала құрылысын жаңа деңгейге шығарады деген сенімдемін.

• 13.08.2021
• 188