​Мобильдік қосымшалар арқылы бағалы қағаздарға инвестициялау туралы

Құрметті қазақстандықтар!

Бағалы қағаздар нарығы әлемдік қаржы жүйесінің ажырамас бөлігі болып табылады. Цифрландырудың жаһандық трендтерін ескере отырып, қазақстандық нарыққа қатысушылар көрсетілетін қаржылық қызметтер спектрін қашықтықтан кеңейтуде.

Пандемия кезінде бизнесті жүргізудің дәстүрлі формаларының өзгеруі халықтың пассивті инвестициялау құралдарын белсенді пайдалануға деген ықыласына әсер етті. Қазіргі уақытта брокерлік компаниялар брокерлік шотты қашықтан басқаруға арналған көп функциялы мобильдік қосымшаларды ұсынады, бұл инвестициялау процесін жеңілдетеді және қолжетімді етеді.

Брокерлердің қосымшалары биржаның сауда жүйесімен өзара іс-қимыл жасайды, бұл клиенттерге бағалы қағаздарды жедел сатып алуға және сатуға, сауда шоты, ақша қозғалысы және бағалы қағаздар туралы мәліметтерді қарауға, мәмілелер бойынша есептерді, белгілі бір кезеңге шоттың жай-күйі туралы үзінді-көшірмелерді қарауға, инвестициялық портфельдің жай-күйіне мониторинг жүргізуге, жасалған мәмілелердің өзекті мәртебесін көруге және тәулік бойы нақты уақыт режимінде биржалық баға белгілеулерді қадағалауға мүмкіндік береді. Қосымшаларда баға белгілеу кестелері, пайыздық бағалардың ауытқуы және инвестициялық шешімдер қабылдауға қажетті басқа да бірқатар көрсеткіштер бар әртүрлі аналитикалық ақпарат бар.

Шот иелері сауда тапсырыстарын қоя алады, инвестициялық шотты банк картасымен толықтыра алады, дербес деректерді жаңарта алады. Сонымен қатар, клиент бұрын жасалған мәмілелердің толық тарихын көру мүмкіндігіне ие болады 

Мобильдік қосымша арқылы электрондық қызметтер алу және осы сервистерде сауда жасау мүмкіндігіне ие болу үшін клиент брокерлік компанияда брокерлік шот ашуы және брокерлік қызмет көрсетуге тиісті шарт жасасуы тиіс. Ол үшін сіз брокердің офисіне жеке хабарласуыңызға болады, алайда клиенттерге ыңғайлы болу үшін шоттарды динамикалық немесе биометриялық сәйкестендіруді қолданумен мобильді қосымшалар арқылы қашықтан ашу және шарт жасасу ұсынылады.

Әдетте, шотты қашықтан ашу процедурасы көп уақытты қажет етпейді, ол үшін мобильді қосымшаны телефонға немесе планшетке жүктеу қажет. Бұдан әрі шотты ашу немесе шартқа бұрынғыдай клиенттің ЭЦҚ арқылы ғана емес, сондай-ақ биометриялық және динамикалық сәйкестендіру арқылы қол қоюға болады.   

Қажет болған жағдайда брокерлер клиентке тартымды қаржы құралдарын іздеуде және іріктеуде консультациялық көмек көрсете алады. Мобильді қосымшаларды қолдану кибер тәуекелдермен байланысты екенін ескере отырып, реттеуші брокерлерге мәмілелерді жасау кезінде қауіпсіздікті қамтамасыз ету бойынша талаптар белгіледі.

Клиентті сәйкестендіру үшін ақпаратты қорғау шаралары мен бағдарламалық-техникалық құралдарының кешені клиентті сенімді аутентификациялауды, оның дербес деректеріне рұқсатсыз кіруден қорғауды және осы ақпараттың брокердің дерекқорлары мен мұрағаттарында толық сақталуын қамтамасыз етуі тиіс.

Бағалы қағаздар нарығында мәмілелер жасау тиісті инвестициялық тәуекелдермен байланысты және сауда үшін толыққанды инфрақұрылымның болуына қарамастан, инвестициялық табысқа не мәмілелерден залалдың болмауына кепілдік бермейді. Сондықтан, жаңадан келген инвестор тәуекелдерді түсініп, инвестициялау мақсатын анықтауы керек, сонымен қатар қаржы реттегішінің лицензиясы бар сенімді брокерді таңдауы керек.

Ол үшін бірінші кезекте брокердің бағалы қағаздар нарығында кәсіби қызметті жүзеге асыруға лицензиясының болуын ҚНРДА сайтында тексеру қажет.

Әрбір инвестор үшін инвестициялау стратегиясын және алға қойылған мақсаттарды өз бетінше анықтау, бағалы қағаздар, мемлекеттік компаниялардың қаржылық көрсеткіштері туралы ақпаратты талдау, сондай-ақ қор нарығындағы жалпы жағдайды бағалау үшін өзінің қаржылық сауаттылығын арттыруға назар аудару аса маңызды.

• 26.08.2021
• 366