Бұқаралық спортты дамыту бойынша жұмыстарды жүйелі түрде жүргізіп келеміз

Спорттық нысандар тек кәсіби спортшылардың жарыстары мен жаттығулары өтетін орын емес, сонымен қатар балалар спортпен шұғылданатын мекеме болуы керек. Спорт нысандарын балалар мен жастар үшін қолжетімді етіп жатырмыз. Бұл жаттығу сапасына, дамуға серпін береді.
Мемлекет басшысының тапсырмасына сәйкес бұқаралық спорт, балалар мен жасөспірімдер спорт мектептерін дамытуға басымдық берілмек. Спорттық инфрақұрылымды кәсіби клубтарға емес, бұқаралық спорт түрлеріне баса назар аудара отырып дамытамыз.
Мысалы, 2020 жылы жеңіл атлетика спорт кешені ашылды. Онда жеңіл атлетиканың 7 түрінен тек кәсіби спортшылар ғана айналыса алатын. ✅ Енді қала тұрғындарын көбірек қамту үшін қыркүйек айынан бастап балалар да бара алады. Ол үшін жеңіл атлетикадан «Nur-Sultan» спорт клубы құрылды. Ол жаттықтырушыларды жалдауға және олардың еңбегіне жалақы төлеуге, сондай-ақ спортпен айналысатын балалар санын арттыруға мүмкіндік береді. Клубтың ерекшелігі – жеңіл атлетикамен ниет білдірген өзге оқушылар да айналыса алады. Яғни, бұған дейін БЖСМ-де болудың қажеті жоқ, дайындықсыз келіп те жаттыға аласыз. Ол үшін қалалық федерацияға жүгіну немесе №9 БЖСМ арқылы тіркелу қажет.
✅Сонымен қатар, балалар мен жасөспірімдер спортының өзге де түрлеріне қолдау көрсетеміз. Қазір қалада 8 мыңнан астам баланы қамтитын 11 балалар мен жасөспірімдер спорт мектебі жұмыс істейді. Қосымша қаржыландыру есебінен балалар санын 50%-дан астам ұлғайтамыз. Сондай-ақ, аула клубтарының санын көбейтеміз. Бірінші кезеңде олардың санын 30-дан 50-ге дейін арттырамыз. Бұл түрлі спорт түрімен айналысатын балалар санын екі есе көп қамтуға мүмкіндік береді.
«Нұр-Сұлтан – жайлы қала» мастер-жоспары аясында соңғы екі жылда 400 аула мен қоғамдық кеңістік (саябақтар, гүлзарлар, желекжолдар) салынды, төрт елді мекенде дене шынықтыру-сауықтыру кешені құрылысын жүргізіп жатырмыз, сондай-ақ үстел теннисі орталығын салып жатырмыз. Бұқаралық спортты дамыту бойынша жұмыстарды жүйелі түрде жүргізіп келеміз.

• 24.09.2021
• 262