Анар Жаилғанова «Электрондық оқыту арқылы адами ресурстарды дамыту: елдердің тәжірибесі» атты халықаралық онлайн-конференцияға қатысты

Нұр-Сұлтанда «Электрондық оқыту арқылы адами ресурстарды дамыту: елдердің тәжірибесі» тақырыбында халықаралық онлайн-конференция өтті.

Іс-шараны ҚР Мемлекеттік қызмет істері агенттігі, Астана Мемлекеттік қызмет хабы, Қазақстанның HR қауымдастығы және Корея Республикасының Персоналды басқару министрлігі ұйымдастырды.

Конференцияға ҚР Мемлекеттік қызмет істері агенттігінің төрағасы Анар Жаилғанова, Мемлекеттік қызмет саласындағы өңірлік хабтың Басқарушы комитетінің төрағасы Әлихан Бәйменов, Корея Республикасының Персоналды басқару министрі Ким Ву Ху, Украинаның Мемлекеттік қызмет мәселелері жөніндегі ұлттық агенттігінің басшысы Наталья Алюшина, Өзбекстан Республикасы Президентінің жанындағы мемлекеттік қызметті дамыту агенттігінің, Грузияның Мемлекеттік қызмет бюросының және т. б. өкілдері қатысты.

Агенттік төрағасы Анар Жаилғанова өз сөзінде Қазақстанның Мемлекеттік қызмет саласындағы цифрландыру тәжірибесімен, сондай-ақ мемлекеттік қызметшілердің цифрлық дағдыларын дамытуға бағытталған шаралар туралы ақпаратпен бөлісті.

Атап айтқанда, "iQyzmet" базасында кадрлық процестерді цифрландырудың бірінші кезеңі ретінде мемлекеттік қызметке іріктеу процесін қайта қарау жүзеге асырылатыны туралы ақпарат айтылды. Іріктеудің барлық кезеңдері бұдан былай автоматтандырылады, бұл рекрутингтік процестердің объективтілігі мен ашықтығын қамтамасыз етеді. Бұдан басқа, кандидаттардың деректері бар бос жұмыс орындарымен және біліктілік талаптарымен автоматты түрде салыстыру мүмкіндігі көзделген. Бұл кандидаттарды проактивті іздеуді жүзеге асыруға мүмкіндік береді.

Қазақстандық мемлекеттік қызметшілерді электрондық оқыту тұрғысынан алғанда, 2020 жылғы наурыздан бастап Қазақстан Республикасы Президентінің жанындағы Мемлекеттік басқару академиясының магистратура мен докторантураның білім беру бағдарламалары бойынша барлық оқу процестері LMS Canvas және Microsoft Teams ақпараттық платформалары базасында онлайн режимінде, қысқа мерзімді бағдарламалар бойынша – Zoom, Microsoft Teams және Moodle платформаларында өтетіні атап өтілді.

Корея Республикасы Персоналды басқару министрлігінің өкілі 2017 жылы құрылған мемлекеттік қызметшілерді оқытудың ұлттық жүйесінің ерекшеліктері туралы айтып берді. Қазіргі уақытта жүйеде 3000-нан астам оқыту мазмұны бар. Бұл курстардың көпшілігі мемлекеттік қызметшілер үшін міндетті болып табылады және мысалы, адалдық пен сатылмаушылық, гендерлік теңдік және т.б. мәселелерге арналған, бұл ретте жалпы және ерекше жұмыс дағдыларын дамытатын курстарды әртүрлі министрліктер бірлесіп пайдаланады. Жалпы алғанда, кореялық мемлекеттік қызметкерлер жылына кемінде 100 сағатты құрайтын оқудан өтуі тиіс. Бұл шарт орындалмаған жағдайда олар лауазымда одан әрі жоғарылауға жатпайды.

Украинаның Мемлекеттік қызмет мәселелері жөніндегі ұлттық агенттігінің басшысы Наталья Алюшина конференцияға қатысушыларға мемлекеттік органдар мен жергілікті өзін-өзі басқару органдарының өкілдері пайдаланатын білімді басқару порталын ұсынды. Бүгінгі таңда порталда 119 білім беру қызметін жеткізуші және 1100 оқыту бағдарламасы бар.

Сондай-ақ, ол Украинаның жергілікті өзін-өзі басқаруды орталықсыздандыруға және реформалауға бағытталған бірлескен швейцариялық-украиндық DESPRO жобасын іске асыру тәжірибесімен бөлісті, оның аясында жергілікті өзін-өзі басқару органдарына кешенді теориялық және практикалық оқыту жүргізіледі.

Сонымен қатар, конференция барысында Грузия, Өзбекстан, сондай-ақ Қазақстан HR қауымдастығының электрондық оқыту тәжірибесі ұсынылды.                     

• 11.10.2021
• 228