Агенттік төрағасы Анар Жаилғанова Жаңғырту жөніндегі ұлттық комиссия отырысына қатысты

ҚР Мемлекеттік қызмет істері агенттігінің төрағасы Анар Жаилғанова ҚР Премьер-Министрі Асқар Маминнің төрағалығымен өткен Жаңғырту жөніндегі ұлттық комиссия отырысына қатысты.

Іс-шара ҚР Парламенті Мәжілісінің төрағасы Нұрлан Нығматулин және орталық мемлекеттік органдардың басшыларының қатысуымен өтті.

Комиссия отырысы барысында «ҚР Тұңғыш Президенті – Елбасы Нұрсұлтан Назарбаевтың бес институционалдық реформасын іске асыру жөніндегі 100 нақты қадам» Ұлт жоспарының және Мемлекет басшысы Қасым-Жомарт Тоқаевтың Қазақстан халқына арнаған Жолдауының орындалу барысы қаралды.

Бұл бағытта атқарылып жатқан жұмыстар туралы бірқатар орталық мемлекеттік органдардың басшылары баяндама жасады.

Қазіргі уақытта Ұлт жоспарының 100 қадамының 72-сі іске асырылды: «Кәсіби мемлекеттік аппаратты қалыптастыру» бағыты бойынша 15 қадамның 13-і, «Заң үстемдігін қамтамасыз ету» бағыты бойынша барлық 19 қадам, «Индустрияландыру және экономикалық өсім» бойынша 50 қадамның 27-сі, «Бірегейлік және бірлік» бағыты бойынша 6 қадамның 3-уі, «Есеп беретін мемлекетті қалыптастыру» бағыты бойынша барлық 10 қадам жүзеге асырылды.

Биыл «Кәсіби мемлекеттік аппаратты қалыптастыру» мен «Индустрияландыру және экономикалық өсім» бағыттары бойынша 9 қадамды орындау жоспарланған.

Премьер-Министр «ҚР Тұңғыш Президенті – Елбасы Нұрсұлтан Назарбаевтың бес институционалдық реформасын іске асыру жөніндегі 100 нақты қадам» Ұлт жоспарын және Мемлекет басшысы Қасым-Жомарт Тоқаевтың Қазақстан халқына Жолдауын толық және сапалы орындау бойынша белсенді жұмысты жалғастыруды тапсырды.

• 11.10.2021
• 290