Қазақстан-Иран үкіметаралық комиссиясы 2022 жылдың басына жоспарланған

ҚР Сауда және интеграция министрінің орынбасары Қайрат Төребаевтың Тегеранға сапары аясында Иран Ислам Республикасының бірқатар мемлекеттік құрылымдарымен келіссөздер өтті. Кездесулер шеңберінде екіжақты қарым-қатынастарды дамытудың, сауда байланыстарын тереңдетудің ағымдағы мәселелері, сондай-ақ Қазақстан-Иран үкіметаралық комиссиясының күн тәртібі мен өткізу мерзімдері талқыланды.

Осылайша, ИИР Индустрия, өнеркәсіп және сауда министрлігіндегі кездесуде тараптар сауда-экономикалық ынтымақтастықты арттыруға мүдделі екендігін атап өтті.

Қайрат Төребаев «біздің елдеріміздің өзара саудасының үлкен іске асырылмаған әлеуеті бар. Біздің жақын арадағы мақсатымыз -10 жыл бұрынғы тауар айналымының көлеміне оралу».

ҚР Сауда және интеграция Вице-министрі ирандық әріптесін Қазақстанда ұлттық және Еуразиялық тауар өткізу жүйесін (ЕТЖ) құру бойынша іске асырылып жатқан бағдарлама туралы хабардар етті. Ол Иран тарапына тауар өткізу жүйесіне қосылу мүмкіндігін қарастыруды ұсынды. «Иран үшін Қазақстан аумағындағы логистикалық орталықтар Еуразиялық одақ нарығына тікелей кіру нүктесі, «бірыңғай терезе» бола алады. Бұл ретте Қазақстаннан және ЕАЭО нарығынан Иранға тауарлардың кері ағыны қамтамасыз етілетін болады», - деді Төребаев.

ИИР Индустрия, өнеркәсіп және сауда вице-министрі Алиреза Пейман Пак қазақстандық делегацияға Иран үкіметі Еуразиялық экономикалық одақ басым бағыт болып табылатын сыртқы экономикалық ынтымақтастықтың жаңа бағдарламасын әзірлеп жатқанын хабарлады. «ЕАЭО-да біз үшін Қазақстан мен Ресей ерекше орын алады»,-деп атап өтті ирандық вице-министр.

Пейман Пак мырза ИИР индустрия, өнеркәсіп және сауда министрлігі «Иранда қазақстандық өнімдерді ілгерілетуге барынша көмек көрсетуге дайын» деп сендірді.

Тараптар сондай-ақ Қазақстан аумағында бірлескен кәсіпорындар құру мүмкіндігін талқылап, импорттаушылар мен сұранысқа ие тауарлар тізбелерімен алмасуға келісті. Сондай-ақ, Үндістан-Иран-ЕАЭО көлік дәлізінің шығыс Каспий тармағы бойынша трафикті арттыру мәселелері қаралды.

Сонымен қатар, өзара сауданы тежейтін бірқатар проблемалық мәселелер талқыланды.

Сондай-ақ, Ауыл шаруашылығы джихад министрлігінің сауданы дамыту жөніндегі министрінің орынбасары Омид Гиланпурмен келіссөздер өтті.

Аталған министрлік Иран тарапынан Қазақстан-Иран үкіметаралық комиссиясының тең төрағасы болып табылады.

Тараптар 2022 жылдың басында кезекті ҮАК өткізу мүмкіндігін, сондай-ақ күн тәртібіне шығарылуы мүмкін мәселелерді талқылады.

Кездесу тақырыптарының бірі Қазақстан аумағында ауыл шаруашылығы өнімдерін қайта өңдеу бойынша экспортқа бағдарланған бірлескен кәсіпорындар құру мүмкіндігі болды. Иран тарапы Еуразиялық экономикалық одақпен сауда-экономикалық байланыстарды тереңдетуге Қазақстанның жәрдемдесуіне үміт білдірді.

Оңтүстік-Солтүстік дәлізі бойынша логистикалық бағыттарды дамыту мәселелерін Қайрат Төребаев Иранның Жол және қала құрылысы вице-министрі, Басқарма Төрағасы және Темір жол президенті Саид Расудимен талқылады.

«Ковид бүкіл әлемде сауда форматтарын айтарлықтай өзгертті. Қытайдың шекаралық тыйымдары балама маршруттардың дамуын ынталандырады. Соның аясында Иран бағыты қызықты болуда», - деп атап өтті Қайрат Төребаев.

Транзиттік контейнерлерді жеткізу сапасы, тариф белгілеу және қызмет көрсету мерзімі (transit-time) туралы мәселе көтерілді.

Иранның вице-министрі «Иранның темір жолдары тарифтерді төмендету мәселесін қарауға дайын» деп сендіріп, ынтымақтастыққа толық дайын екенін білдірді. Сонымен қатар, ол Иран қазақстандық тауарларды басқа өңірлерге тасымалдау бойынша логистикалық алаң болуға дайын екеніне сендірді.

Екі ел бизнесінің ынтымақтастығын тереңдету мәселелерін ҚР Сауда және интеграция вице-министрі Иран Сауда-Өнеркәсіп, Тау-кен өндіру және Ауыл шаруашылығы палатасының президенті Голамхосейн Шафеймен талқылады.

Шафей мырза хабарлағандай, Иран тарапы Қазақстанмен мұнай-газ, АӨК, металлургия және т.б. салалардағы ынтымақтастық әлеуетінің, сондай-ақ ол Иран тарапы өнеркәсіптік кооперация үшін - өнімді кейіннен Иранға және үшінші елдерге экспорттау үшін ҚР аумағында өндірістер құру үшін үлкен әлеуеттің бар екенін көретіндігін айтты.

Ресми келіссөздерден басқа Қайрат Төребаев бизнес-қоғамдастық өкілдерімен: ритейлерлермен, трейдерлермен, логистикалық, қаржылық, машина жасау және басқа да компаниялармен кездесулер өткізді.

• 14.10.2021
• 211