С. Шәпкенов: зейнеткерлердің жағдайы нашарламауға тиіс

Бұл туралы Еңбек және халықты әлеуметтік қорғау министрі Серік Шәпкенов Еңбек және халықты әлеуметтік қорғау министрлігінің алқа отырысында Мемлекет басшысының Қазақстан халқына жыл сайынғы Жолдауында берген тапсырмаларын орындау және ведомствоның ағымдағы жылдың 9 айындағы қызметінің қорытындылары туралы айтты.

Бейнеконференцбайланыс режиміндегі іс-шараға Парламент депутаттары, Президент Әкімшілігінің, Премьер-Министр Кеңсесінің, «Атамекен» ҰКП өкілдері, вице-министрлер, Еңбекмині департаменттерінің директорлары мен қоғамдық кеңес мүшелері, облыстар, Нұр-Сұлтан, Алматы, Шымкент қалалары әкімдерінің орынбасарлары, өңірлік жұмыспен қамтуды үйлестіру және әлеуметтік бағдарламалар басқармаларының басшылары қатысты.

Еңбекминінің басшысы азаматтарды зейнетақымен қамтамасыз етуге ерекше назар аударды.

«Бүгінде зейнеткерлер саны 2,2 млн адамды құрайды. Жүргізілген индекстеуді есепке алғанда бюджеттен берілетін зейнетақының орташа мөлшері – 99 857 теңге, оның ішінде ынтымақты зейнетақы – 68 774 теңге, базалық зейнетақы – 31 083 теңге. Қазақстан Президентінің тапсырмасына сәйкес жеткіліктілік шегінен асқан зейнетақы жинақтарын 500 мыңнан астам адам алды. Жыл басынан бері азаматтар өздерінің тұрғын үй жағдайларын жақсартуға, емделуге және зейнетақы активтерін басқару жөніндегі компанияларға 1,9 трлн теңгеден астам қаражат жіберді», – деді Серік Шәпкенов.

Сонымен қатар, ол ынтымақтыдан жинақтаушы зейнетақыға көшуді ескере отырып, жоғалтылған табысты зейнетақымен алмастыру коэффициенті жыл сайын төмендейтінін атап өтті. Бірыңғай жинақтаушы зейнетақы қорының актуарлық есептеулеріне сәйкес, 2026 жылы зейнетақы орташа айлық табыстың шамамен 39%-ын алмастыраса, 2040 жылы 20%-ын, ал 2060 жылы небәрі 18%-ын алмастырады.

«Зейнеткерлердің, оның ішінде болашақ зейнеткерлердің жағдайы нашарламауы керек! Қазіргі уақытта зейнетақы жүйесінің тиімділігін қамтамасыз ету үшін Зейнетақы жүйесін одан әрі жаңғыртудың 2030 жылға дейінгі қолданыстағы тұжырымдамасына өзгерістер мен толықтырулар енгізу бойынша жұмыстар жүргізілуде. Біріншіден, базалық зейнетақы төлемінен ең төменгі кепілдендірілген зейнетақыға көшу есебінен ең төменгі кепілдіктер жүйесін жетілдіру көзделеді. Екіншіден, қолданыстағы Тұжырымдамада 2023 жылдан бастап жұмыс берушілердің 5% міндетті зейнетақы жарналарын енгізу көзделген. Нәтижесінде азаматтарды зейнетақымен қамсыздандыру деңгейін Халықаралық еңбек ұйымы ұсынған стандарттан төмен болмайтындай – жоғалған кірістің кемінде 40%-ы деңгейінде сақтау қамтамасыз етіледі», – деп хабарлады министр.

• 15.10.2021
• 203