С. Шәпкенов халықты жұмыспен қамту шаралары туралы хабарлады

Еңбек және халықты әлеуметтік қорғау министрі Серік Шәпкенов Еңбек және халықты әлеуметтік қорғау министрлігінің алқа отырысында Мемлекет Басшысының жыл сайынғы Қазақстан халқына Жолдауында берілген тапсырмаларды орындау және ведомствоның ағымдағы жылдың 9 айындағы қызметінің қорытындылары туралы айтып берді.

Бейнеконференц байланыс режиміндегі іс-шараға Парламент депутаттары, Президент Әкімшілігінің, Премьер-Министр Кеңсесінің, «Атамекен» ҰКП өкілдері, вице-министрлер, Еңбекмині департаменттерінің директорлары мен қоғамдық кеңес мүшелері, облыстар, Нұр-Сұлтан, Алматы, Шымкент қалалары әкімдерінің орынбасарлары, өңірлік жұмыспен қамтуды үйлестіру және әлеуметтік бағдарламалар басқармаларының басшылары қатысты. 

Серік Шәпкенов өз сөзінде Еңбекмині азаматтарды жұмыспен қамту шараларына ерекше назар аударатынын, бұл халықтың табысын арттыруға тікелей ықпал ететінін атап өтті.

«Ағымдағы жылы жұмыспен қамту шараларымен 1,2 млн адам қамтылады. Бүгінгі таңда «Еңбек» мемлекеттік бағдарламасына 579 мың адам қатысты, олардың 377 мыңы жұмысқа орналастырылды, 67%-дан астамы тұрақты жұмысқа орналасты. Жұмыспен қамту Жол картасының 193 жобасы іске асырылуда, онда 7 мыңнан астам адам жұмысқа орналастырылды. Басқа мемлекеттік бағдарламалар мен жеке жобалар аясында 465 мың адам жұмысқа орналастырылды. Жұмыспен қамтылғандардың жартысынан көбі тұрақты жұмыс орнында жұмыс істейді», – деді министр.

Еңбекминінің басшысы «Еңбек» мемлекеттік бағдарламасының іске асырылу барысы туралы егжей-тегжейлі хабардар етті. Оның аясында 64 мыңнан астам адам оқумен қамтылды, оның ішінде 16 мыңнан астам қазақстандық қысқа мерзімді курстарға, 15 мыңнан астам қазақстандық ТжКБ бойынша оқуға, тағы 33 мыңы «Бастау Бизнес» жобасы бойынша оқуға жіберілді, кәсіпкерлік бастаманы дамыту үшін 6,5 мың кредит және 22 мың өтеусіз грант берілді. 165 мыңнан астам адам субсидияланатын жұмыс орындарына орналастырылды. «Алғашқы жұмыс орны» және «Ұрпақтар келісімшарты» жобаларында 1,8 мыңнан астам адам жұмысқа орналастырылды. Еңбек ресурстарының ұтқырлығы шеңберінде 5,5 мың адам көшірілді.

«Жұмыспен қамтудың жол картасы жобаларында бірінші бағыт бойынша 19,8 мың жұмыс орны құрылады, оның ішінде 8,3 мың тұрақты жұмыс орны. Екінші бағыт бойынша жеңілдетілген шағын несие алушылар қосымша 10,6 мың жұмыс орнын ашады. Ағымдағы жылдың 15 қыркүйегінен бастап Жұмыспен қамтудың жол картасы мына жаңа бағыттармен толықтырылды – «Агроөнеркәсіптік кешенді дамыту» және «Өңірлерде бизнесті дамыту».

Агроөнеркәсіптік кешенді дамыту шеңберінде Ауыл шаруашылығы министрлігі және «Бәйтерек» холдингімен бірлесіп 42 инвестициялық жоба іске асырылып, тағы 6 мың жұмыс орны, оның ішінде 3,8 мың тұрақты жұмыс орны құрылады.

Бизнесті дамыту шеңберінде өңірлерде жеңілдікпен кредит беру және бизнес субъектілеріне қарыз беру, сондай-ақ жарғылық капиталға инвестициялау, қаржылық емес қолдау көрсету көзделген. 6 мыңға жуық жұмыс орны құрылады. 

Осылайша, ЖҚЖК жаңа жұмыс орындарын құру арқылы іске асыру отбасы мүшелерін ескере отырып, шамамен 90 мың адамды тұрақты табыспен қамтамасыз етуге мүмкіндік береді», – деп толықтырды Серік Шәпкенов.

Министр сөзінің қорытындысында болашақта жұмыспен қамтуды қамтамасыз ету кәсіпкерлікті дамытудың ұлттық жобасы және жұмыс орындарын құрудың өңірлік карталары шеңберінде жалғастырылатынын хабарлады.

• 15.10.2021
• 272