Qaztrade Каспий маңы елдерімен өзара сауданы арттыру үшін бірқатар шараларды ұсынды

2021 жылғы 19 қазанда Ақтау қаласында (Қазақстан) «Каспий порттары және кеме қатынасы 2021» 2-ші халықаралық көрмесі және конференция басталды, оған «QazTrade» АҚ-ның басшылығы қатысты.

20 қазанда «QazTrade» АҚ Бас директоры Азамат Асқарұлы «Каспий теңізі аймағында әлемдік экономикаға қызмет көрсету үшін сауда сұранысын пайдалану» конференциясының панельдік сессиясының спикері ретінде «Каспий теңізі порттары арқылы сауданы ұлғайту» тақырыбында баяндама жасады.

Атап айтқанда, Азамат Асқарұлы Транскаспий бағыттары мен Қазақстандық Каспий порттарының артықшылықтарын, сондай-ақ олардың Каспий маңы елдерімен өзара сауданы арттырудағы рөлін атап өтті. Осылайша, Транскаспий халықаралық көлік бағыты отандық өнімді Кавказ, Түркия және Еуропа нарықтарына ілгерілету үшін белсенді түрде пайдаланылуда. Сондай-ақ, қазіргі шектеулерге қарамастан, Таяу Шығыс пен Оңтүстік Азия нарықтарына шығу мүмкіндігімен Иран бағытындағы Солтүстік-Оңтүстік дәлізі үлкен әлеуетке ие болуда.

Сонымен қатар, ол бәсекеге қабілетті тарифтік жағдайлар жасау, өзара логистикалық сервистерді дамыту, экспорттық рәсімдерді оңайлату қажеттігін де атап өтті, бұл сауданың тауар номенклатурасын әртараптандыру және кеңейту үшін күшті серпін беруі мүмкін.

Бұдан басқа, Азамат Асқарұлының айтуынша, 24 көтерме-тарату орталығын (КТО) салу жоспарланып отырған Қазақстанның жалғыз теңіз қақпасы болып табылатын Ақтау және Құрық порттары Каспий маңы елдерімен, Түркиямен және Еуропамен экспорттық-импорттық ағындарды бөлуге қатыса отырып, бірыңғай тауар өткізу жүйесіне интеграцияланатын болады.

Сондай-ақ, ол «QazTrade» компаниясы өңделген өнімнің экспорттық әлеуетін арттыру үшін, атап айтқанда, кәсіпорынды идеядан жаңа нарықтарға өнім жеткізуге дейін сүйемелдеуді көздейтін экспорттық акселерация бағдарламасы аясында өндірушілерге қолдау көрсетудің түрлі шаралары туралы хабарлады. Бұл ретте, Каспий өңірі мен Түркия 2022 жылға арналған осы бағдарламаны дамытудың перспективалы бағыттарының бірі болып табылады,- деп атап өтті спикер.

• 26.10.2021
• 199