Өмір сүруге жайлы қала болудың басты шарты – қауіпсіздік.

Қылмысты алдын алу мақсатында 3740 камера орнатылып, 300-ден астам көшелер жарықтануда.

Әрбір қала тұрғыны өз ауласын мақтан тұтатын дәреже мен мәдениетке жету келесі алғышарт.
Біз бұл дәрежеге тек жұмыла жұмыс жасап жетеміз. "Халық қатысатын бюджет" жобасымен сіздердің ұсыныстарыңыз бойынша 66 аула жаңартылды. Балалар ойын алаңшалары, тренажерлік бұрыштар, орындықтар, қоқыс урналары, жарықшамдар қойылды. Аяқжолдар төселіп, көгалдар мен гүлдер отырғызылды.

Жайлы қала болудың тағы бір шарты – бұл саябақтар, скверлер мен демалыс алаңдарының қолжетімді әрі жеткілікті болуы.

Қаламызда қазір 8 парк, 39 гүлзар мен аллея, 19 демалыс алаңдары бар. Жақында ғана ескі қоқыс полигоны он айды араға салып демалыс алаңына айналғанына сізбен бірге куә болдық. Бұл бағыттағы жұмыстар үздіксіз жалғасатын болады. Жасыл желек бір күнде өсіп, жетілмейді. Ол үшін уақыт қажет. Егілген ағаштарға қоғам боп қамқор болайық. Ирригациялық жүйелер желісін де кезең-кезеңімен ұлғайтатын боламыз.

Соңғы екі жылда 12 аллея мен гүлзар жаңартылды. Ағаш көшеттерін өсіруде тұқымбақ көлемін 8 гектарға жеткізіп отырмыз. Көпжылдық гүл тұқымдарын егу жұмыстарын бастадық.

Жаңа құрылыстар қала өркендеуінің көрсеткіші. Жобалауда жасыл желекке зиян тигізбеу мәселесі мүмкіндігінше ескерілуде. Көшіруге келмейтін ағаштардың орнын еселеп толықтыру талабы мердігер ұйымдармен жасалатын келісімшартта міндетті түрде көрсетіледі. Бұл мәселе ерекше бақылауымда болады.

• 28.10.2021
• 424