Цифрландыру туралы

Цифрландыру тақырыбын жалғастыра отырып, «Цифрлық Қазақстан» мемлекеттік бағдарламасы аясында «Электрондық қылмыстық іс», «Әкімшілік құқық бұзушылықтардың бірыңғай тізілімі», «Тексеру субъектілері мен объектілерінің бірыңғай тізілімі» жобалары, Талдау орталығы іске асырылып жатқанын атап өткім келеді.

Бұл цифрлық шешімдер азаматтардың құқықтары мен бизнестің мүдделерін қорғауды күшейтті, сондай-ақ мемлекеттік органдардың жұмыс процестерін айтарлықтай оңтайландырды.

Тексеру субъектілері мен объектілерінің бірыңғай тізілімі арқылы кәсіпкерлердің құқықтарын қорғау қамтамасыз етіледі. Биыл жүйенің көмегімен 447 заңсыз тексерудің жолы кесілді, соның ішінде шағын бизнесті тексеруге мораторий аясында бақылаушы органдарға 75 тексеруді тіркеуден бас тартылды.

Қылмыстық істердің 75,3%-ін қылмыстық қудалау органдары электрондық форматта тергеп-тексеруде.

Әкімшілік іс жүргізуде хаттамалардың 88%-і электрондық форматта жасалады.

«Талдау орталығы» көпфункционалды жүйесі талдау жасау және тәуекелдерді болжау мақсатында мемлекеттік базалардың деректерін өңдейді.

Біздің мамандардың еңбектеріне Беларусь, Қырғызстан және Өзбекстан қызығушылық танытып отыр. Қырғызстанда 2019 жылдан бастап қазақстандық жүйеге ұқсас «Қылмыстар мен теріс қылықтардың бірыңғай тізілімі» жұмыс жасайды.

Ақпараттық жүйелерді енгізу бойынша қазақстандық тәжірибені зерттеу шеңберінде Қырғызстан, Өзбекстан және Молдова прокуратураларының делегациялары Құқықтық статистика және арнайы есепке алу комитетінде болды.

Құқық қорғау жүйесін цифрландырудың мемлекеттік органдар қызметі тиімділігінің кепілі болып табылады, құқықтық статистиканың ашықтығы мен анықтығын қамтамасыз етеді, сыбайлас жемқорлық тәуекелдерін барынша азайтады деп сенемін.

• 04.11.2021
• 270