ДСҰ мүшелері Қазақстан Республикасының сауда рәсімдерін жеңілдету бойынша жүргізіп жатқан реформаларын жоғары бағалады

Женевада (Швейцария) ДСҰ-ның сауда рәсімдерін жеңілдету жөніндегі комитетінің отырысы өтті. Отырыс барысында Ттараптар Сауда рәсімдерін жеңілдету туралы келісімді (бұдан әрі – ДСҰ СРЖК) іске асыру саласында тәжірибе алмасты. ДСҰ СРЖК жедел қозғалысқа, тауарларды шығаруды және кедендік тазартуды оңайлатуға, сондай-ақ кеден және басқа органдар арасындағы ынтымақтастықты жақсартуға ықпал ететін бірінші көпжақты келісім болып табылады.

Бейнеконференция режимінде Қазақстан Республикасының Сауда және интеграция министрлігі ДСҰ СРЖК ережелерін Қазақстан Республикасының іске асыру нәтижелерімен таныстырды.

Мәселен, «Астана – 1» электрондық кедендік декларациялаудың ақпараттық жүйесін енгізу, экспорттық-импорттық операциялар бойынша, уәкілетті экономикалық операторлар үшін кедендік ресімдеуді оңайлату бойынша «Бір терезені» іске асыру, сауда рәсімдерін оңайлату мақсатында ақпарат алмасу мәселесі бойынша Қазақстан кеден органдарының көрші елдермен ынтымақтастығын жақсарту туралы ақпарат ұсынылды.

Сыртқы сауда саласында одан әрі қолайлы орта құру, сондай-ақ бизнес үшін жағдайларды жақсарту үшін Қазақстан Республикасының сауда және интеграция министрлігі сыртқы сауда рәсімдерін оңайлату жөніндегі жұмысты жалғастырады.

ДСҰ комитетінің төрағасы және ДСҰ-ның басқа мүшелерінің өкілдері Қазақстанның халықаралық сауданы жүзеге асыру үшін құжаттарды алу кезінде ақпаратқа транспарентті қол жеткізуді жақсартудағы, рұқсат беру құжаттарын жеделдетіп берудегі, көрші елдермен шекара бекеттерінің қызметін үйлестіруді жақсартудағы, тауарлардың экспортын, импортын және транзитін іске асыру рәсімдерін жақсартудағы жетістіктерін атап өтті.

Еуропалық Одақ өкілдері Еуропалық Одаққа мүше мемлекеттер арасында одан әрі талқылай отырып, Қазақстан Республикасының тұсаукесеріне қызығушылық білдірді.

• 09.11.2021
• 160