ҚР Сауда және интеграция министрі Бақыт Сұлтанов Вашингтонда сауда келіссөздерін өткізді

АҚШ Сауда өкілі Кэтрин Тай және АҚШ сауда министрлігінің өкілдерімен кездесулерде тараптар екі елдің сауда-экономикалық қатынастарының ағымдағы мәселелерін талқылады. Атап айтқанда, екі ел ковидтік тыйымдардың теріс әсерін жеңе білді және тауар айналымы 2019 жылдың деңгейіне жетті.

Анықтама:

Қазақстан мен АҚШ арасындағы тауар айналымы 2021 жылғы қаңтар-қыркүйекте 1,63 млрд. АҚШ долл. 2019 жылдың ұқсас кезеңінде тауар айналымы 1,64 млрд. АҚШ долл. құрады.

Тараптар, сондай-ақ, өзара сауда көрсеткіштеріне теріс әсер ететін проблемалық мәселелерді қозғады.

Осылайша, Министр Сұлтанов Қазақстан мен АҚШ арасындағы тұрақты қалыпты сауда қатынастарын (PNTR) жолға қою Джексон-Вениктің түзетуінің болуына байланысты тежеліп отырғанын атап өтті. Бұл түзетудің күшін жою екі елдің сауда-экономикалық қатынастарын жаңа деңгейге шығаруға ықпал ететін болады.

Сұлтановтың АҚШ Сауда өкілімен кездесуі барысында Кэтрин Тай Орталық Азия өңірі шеңберінде екіжақты және көпжақты ынтымақтастықты құрудағы қазақстандық тараптың рөлін атап өтті. Ол Вашингтон әкімшілігінің "АҚШ-тың Орталық Азиямен сауда қатынастарын тереңдетуге" бейімділігін атап өтті. 

Сондай-ақ, Қазақстанның төрағалығымен өтетін ДСҰ-ның 12-ші Министрлік конференциясының күн тәртібіндегі мәселелер көтерілді.

Бақыт Сұлтанов МК-12 барысында бірқатар өзекті мәселелер бойынша консенсусқа қол жеткізуге үміт білдірді. Атап айтқанда, вакциналар мен негізгі медициналық тауарларға тең қол жетімділікті қамтамасыз ету үшін шешуші маңызы бар COVID-19 пандемиясына жауап ретінде ДСҰ-ға ден қою жөніндегі көпжақты шешім бойынша. Осы мәселе бойынша МК-12-де шешімге қол жеткізудің маңыздылығын ескере отырып, Министр АҚШ-тың covid-19 пандемиясына жауап ретінде мүше елдердің тиімді сауда шараларын қабылдауына ықпал ететін сауда рәсімдерін жеңілдету жөніндегі бастаманы ілгерілетудегі күш-жігерін атап өтті.

Қазақстан теңізге шығатын жолы жоқ ірі ел бола отырып, транзиттік әлеуетті дамытуға және өз шекаралары арқылы тауарлардың еркін жүруіне мүдделі екені атап өтілді. Осы мақсатта біздің еліміз ДСҰ алдындағы өз міндеттемелерін орындайды және пандемия кезеңінде аса маңызды тауарларды ілгерілету үшін рәсімдерді жеңілдету жөніндегі ДСҰ келісімінің әлеуетін толық пайдалануды қолдайды.

АҚШ-тың Сауда министрлігінде өткен кездесу барысында америкалық және қазақстандық бизнестің ҚР-да сирек кездесетін металдарды өндіру және қайта өңдеу саласындағы ынтымақтастық мүмкіндігі талқыланды. Тараптар, сондай-ақ, келесі жылы Сауда миссияларымен алмасу және сатылатын тауарлар мен қызметтердің номенклатурасын кеңейту жөніндегі бейресми жұмыс тобын құру қажеттілігі туралы қорытындыға келді.

Сондай-ақ, Министр Сұлтановтың конгрессмендермен, Америка Құрама Штаттарының Сауда Палатасының өкілдерімен, Қазақстан-Америка Іскерлік кеңесінің мүшелерімен, Халықаралық даму жөніндегі американдық қаржы корпорациясының басшылығымен және АҚШ-тың ми орталықтарымен кездесулері өтті. 

Қазақстан делегациясы Вашингтонға Экономикалық ынтымақтастық және сауда-экономикалық мәселелерді АҚШ Сауда ведомстволарының, сондай-ақ Америка Құрама Штаттарының мемлекеттік органдары мен ұйымдарының талқылауы бойынша жоғары деңгейдегі топтың отырысына қатысу шеңберінде келді.

• 12.11.2021
• 377