Қазақстан мен Түркия шекара маңындағы орталықтарды дамытуда ынтымақтасатын болады

ҚР Сауда және интеграция министрі Бақыт Сұлтанов "Цифрлық дәуірдегі жасыл технологиялар мен ақылды қалалар" тақырыбында Түркітілдес мемлекеттердің ынтымақтастық кеңесінің 8-ші Саммитінің (ТМЫК Саммиті) жұмысына қатысты.

Саммит аясында Министр Сұлтановтың Түркия Республикасының Сауда министрі Мехмет Мушпен екіжақты кездесуі өтті.

Тараптар екіжақты сауда, инвестициялар, кеден және логистика саласындағы ынтымақтастықтың өзекті мәселелерін талқылады.

Бақыт Сұлтанов Қазақстан Түркиямен өзара тиімді шарттарда тауар айналымы көлемін арттыру бөлігінде екіжақты өзара іс-қимылды кеңейтуге үлкен мән беретінін атап өтті.

Атап айтқанда, ол қазақстандық тарап сауда-инвестициялық ынтымақтастықты одан әрі тереңдетуге әрдайым мүдделі екенін хабарлады. Сарапшылардың бағалауы бойынша Түркияға қазақстандық экспортты ұлғайту әлеуеті 90 тауар позициясы бойынша $598,3 млн.сомаға бағаланады.

Бақыт Сұлтанов Қазақстан мен Түркия Президенттері екі ел үкіметтерінің алдына өзара сауданы жылына 10 млрд долларға дейін арттыру міндетін қойғанын еске салды.

Екі тарап та осы көрсеткіштерге жедел қол жеткізуге сауда рәсімдерін өзара оңайлату және екі елдің транзиттік-логистикалық әлеуетін пайдалану және көрсетілетін қызметтердің еркін саудасы туралы елдер әзірлейтін келісім ықпал етуі мүмкін екенін атап өтті.

Министр Муш саудадағы кедергілерді алып тастау екі елдің келесі жылы тауар айналымы көрсеткішіне 7 млрд долларға қол жеткізуіне мүмкіндік беретінін атап өтті.

- Біздің экономикаларымыз бір-бірін өзара толықтырады. Сондықтан бізде сауданы арттыру үшін үлкен әлеует бар, - деді Түркияның Сауда министрі.

Кездесуде талқыланған мәселелердің бірі - екі елдің транзиттік әлеуетін күшейту, сондай-ақ өңірлік сауданы, оның ішінде Орталық Азиядағы шекара маңындағы сауда-индустриялық орталықтарды дамыту арқылы арттыру мәселелері болды.

Министр Муш түрік тарапының трансшекаралық сауданы дамытуда барынша көмек көрсетуге дайын екенін білдірді, бұл мәселе бойынша Түркияның үлкен тәжірибесін атап өтті.

ҚР Сауда және интеграция министрі Бақыт Сұлтанов пен Түркия Республикасының Сауда министрі Мехмет Муш Қазақстан аумағында трансшекаралық сауда-экономикалық ынтымақтастық орталықтарын дамыту саласындағы өзара түсіністік туралы Меморандумға қол қойды.

• 12.11.2021
• 283