Халықаралық шарттық жұмыс туралы

Прокуратура органдары қылмыстық-құқықтық салада шет мемлекеттермен халықаралық ынтымақтастықты белсенді дамытуда.

Барлығы 33 шет елмен 69 екіжақты халықаралық шартқа қол қойылды. Біздің серіктестеріміздің қатарында АҚШ, Қытай, Ұлыбритания, Үндістан, Бразилия, Сауд Арабиясы, Түркия және басқа да мемлекеттер бар.

Мұндай келісімдер жасасу жөніндегі жұмыстың айтарлықтай жандандырылғанын атап өткім келеді, егер бұрын бір жылда 2-3 шарт жасалса, 2014 жылдан бастап - 6-7 шарт жасалуда.

Мысалы, а.ж. 28 қазанда Бас прокуратурада Қазақстан Республикасы мен Француз Республикасы арасында Францияның құқық қорғау органдарымен ынтымақтастықты жүзеге асыруға мүмкіндік беретін қылмыстық істер бойынша өзара құқықтық көмек туралы шартқа қол қойылды.

Биылғы жылы Парламент Оңтүстік Кореямен және Болгариямен сотталған адамдарды беру туралы шарттарды, сондай-ақ Солтүстік Македониямен шарттардың толық пакетін (ұстап беру туралы, қылмыстық істер бойынша құқықтық көмек көрсету туралы және сотталғандарды беру туралы) ратификациялады.

Қазіргі уақытта Мемлекет басшысының Жарлықтарымен Доминикан Республикасымен шарттардың толық пакеті, Перумен, Израильмен, Өзбекстанмен сотталған адамдарды беру туралы және Малайзиямен адамдарды ұстап беру туралы шарттар мақұлданды және қол қоюға дайын.

Бүгінде Словакия, Аргентина, Перу, Португалия, Пәкістан, Кипр және Египетпен осындай келісімдерге қол қою туралы келіссөздер жүргізілуде.

Біз бұл жұмысты жалғастырамыз.

• 15.11.2021
• 265